वीर अस्पतालका लेखा अधिकृत दाहालविरुद्ध भ्रष्टाचार मुद्दा, विशेष अदालतमा आरोपपत्र दायर

काठमाडौं, चैत २५। अख्तियार दुरुपयोग अनुसन्धान आयोगले चिकित्सा विज्ञान राष्ट्रिय प्रतिष्ठान अन्तर्गत वीर अस्पतालमा कार्यरत लेखा अधिकृत ढुण्डी राज दाहालविरुद्ध घुस/रिसवत लिएको आरोपमा विशेष अदालतमा मुद्दा दायर गरेको छ।
आयोगका अनुसार दाहालले विभिन्न सप्लायर्स कम्पनी तथा ठेकेदारहरूबाट भुक्तानी प्रक्रिया सहजीकरण गरिदिने बहानामा घुस रकम लिएको उजुरीका आधारमा अनुसन्धान अघि बढाइएको थियो। सोही क्रममा आयोगको टोलीले उनलाई कार्यकक्षबाटै नगद रु.१ लाख २० हजार ८५० सहित नियन्त्रणमा लिएको जनाएको छ।
अनुसन्धानबाट दाहालले अस्पतालको आन्तरिक स्रोतबाट भुक्तानी दिने क्रममा गैरकानुनी लाभ लिने उद्देश्यले योजनाबद्ध रूपमा सेवाग्राहीसँग मोलमोलाई गरी रु.९३ हजार ८५० घुस लिएको पुष्टि भएको आयोगले जनाएको छ।
उक्त कार्य भ्रष्टाचार निवारण ऐन, २०५९ को दफा ३ (१) बमोजिमको कसुर ठहर गर्दै आयोगले सोही बराबर बिगो कायम गरी कैद तथा जरिवानाको मागदाबी सहित विशेष अदालत काठमाडौं मा आरोपपत्र दायर गरेको हो।
आयोगका सहायक प्रवक्ता गणेशबहादुर अधिकारीद्वारा जारी विज्ञप्तिमा सार्वजनिक निकायमा हुने अनियमितता नियन्त्रणका लागि निगरानी कडाइका साथ जारी रहने उल्लेख गरिएको छ।