इन्डोनेसियाको मोलुकामा ७.४ म्याग्निच्युडको शक्तिशाली भूकम्प, सुनामीको चेतावनी जारी

काठमाडौं, चैत १९ । इन्डोनेसियाको पूर्वी भागमा पर्ने मोलुका टापुसमूह (मालुकु) केन्द्रविन्दु भएर बिहीबार बिहान ७.४ म्याग्निच्युडको शक्तिशाली भूकम्प गएको छ। अमेरिकी भूगर्भ सर्वेक्षण (यूएसजीएस) ले जनाएअनुसार स्थानीय समयअनुसार बिहान ६:४८ बजे (नेपाली समय अनुसार बिहान ३:४८ बजे) गएको यो भूकम्पको केन्द्र पश्चिम सिराम (सेराम) क्षेत्रको उत्तर–पूर्वमा रहेको छ।

प्रारम्भमा भूकम्पको तीव्रता ७.८ म्याग्निच्युड मापन गरिएकोमा पछि गरी ७.४ म्याग्निच्युडमा सच्याइएको यूएसजीएसले जनाएको छ।

भूकम्पको तीव्रता र केन्द्रविन्दु समुद्रनजिक भएकाले इन्डोनेसियाको मौसम विज्ञान, जलवायु विज्ञान र भूभौतिकी एजेन्सी (बीएमकेजी) ले तुरुन्तै सुनामीको चेतावनी जारी गरेको छ। स्थानीय प्रशासनले तटीय क्षेत्रका बासिन्दाहरूलाई उच्च भू–भागमा सुरक्षित स्थानमा जान निर्देशन दिएको छ। केही क्षेत्रमा सामान्य तहभन्दा माथि समुद्री लहरहरू देखिएको स्थानीय सञ्चारमाध्यमहरूले जनाएका छन्।

हालसम्म ठूलो क्षति वा मानवीय क्षतिको विस्तृत विवरण आइसकेको छैन। तर, केन्द्रविन्दु नजिकका सहरहरू जस्तै अम्बोन र सिराममा बासिन्दाहरूमा व्यापक त्रास फैलिएको छ। धेरैले घरबाहिर नै रात बिताउन बाध्य भएका छन्। प्रारम्भिक रिपोर्टअनुसार केही घरहरूमा भने क्षति पुगेको हुन सक्ने अनुमान गरिएको छ।

इन्डोनेसिया ‘प्यासिफिक रिङ अफ फायर’ मा पर्ने भएकाले यहाँ नियमित रूपमा भूकम्प जाने गर्दछ। यसअघि सन् २०१८ मा सुलावेसी टापुमा गएको ७.५ म्याग्निच्युडको भूकम्पपछि आएको सुनामीमा चार हजारभन्दा बढीको मृत्यु भएको थियो।

एजेन्सीको सहयाेगमा