ट्रम्पको चेतावनी: नाटाेले सहयोग नगरे ग्रीनल्यान्ड सुरक्षा रणनीति अघि बढाउने

काठमाडौं, चैत ७ । अमेरिकी राष्ट्रपति डोनाल्ड ट्रम्पले नाटाे सहयोगी राष्ट्रहरूप्रति असन्तुष्टि जनाउँदै होर्मुज जलडमरूमध्य खोल्न सहयोग नगरे वैकल्पिक सुरक्षा रणनीति अघि बढाउन सकिने चेतावनी दिएका छन्।

ट्रम्पले आज सामाजिक सञ्जालमार्फत सार्वजनिक गरेको पछिल्लो सन्देशमा नाटाेका सदस्य राष्ट्रहरूले होर्मुज जलडमरूमध्य खोल्न सहयोग गर्न अस्वीकार गरिरहेको आरोप लगाएका छन्। उनले उक्त कार्य “सजिलो, छिटो र सुरक्षित” रहेको उल्लेख गर्दै युद्ध “धेरै हदसम्म जितिसकिएको” दाबी समेत गरेका छन्।

राष्ट्रपति ट्रम्पले सहयोग अभाव जारी रहेमा ग्रीनल्यान्डलाई अमेरिकी राष्ट्रिय सुरक्षासँग जोडेर नयाँ रणनीति अघि सार्न सकिने संकेत दिएका छन्। “हाम्रो राष्ट्रिय सुरक्षाका लागि ग्रीनल्यान्ड सुरक्षित गर्ने प्रतिबद्धता पुनः पुष्टि गर्नुपर्ने हुन सक्छ,” उनले भनेका छन्।

यसै क्रममा उनले नाटाेप्रति अमेरिका लामो समयदेखि आर्थिक तथा सैन्य सहयोग गर्दै आएको उल्लेख गर्दै त्यसको प्रतिफल नपाएको गुनासो गरेका छन्। “अब उनीहरूले हामीलाई कुनै न कुनै रूपमा फिर्ता दिनुपर्ने समय आएको छ,” ट्रम्पको भनाइ छ।
ट्रम्पले आफ्नो पहिलो कार्यकालमा अमेरिकी सेनालाई विश्वकै शक्तिशाली बनाएको दाबी गर्दै आवश्यक परे त्यसलाई पूर्ण क्षमतामा प्रयोग गर्ने चेतावनी दिएका छन्।
विश्लेषकहरूका अनुसार ट्रम्पको यो अभिव्यक्तिले अमेरिका–युरोप सम्बन्धमा नयाँ तनाव उत्पन्न गर्न सक्ने देखिएको छ। साथै, ग्रीनल्यान्डसम्बन्धी अभिव्यक्तिले अन्तर्राष्ट्रिय कूटनीतिक बहसलाई समेत थप चर्काउने सम्भावना रहेको छ।