जटिल प्रसुति समस्यामा परेकी महिलाको हेलिकोप्टरबाट उद्धार

काठमाडौं, चैत ५ । महिला, बालबालिका तथा ज्येष्ठ नागरिक मन्त्रालयले सञ्चालन गरेको ‘राष्ट्रिय महिला सशक्तीकरण परियोजना’ अन्तर्गत जटिल प्रसुति समस्यामा परेकी एक महिलाको हवाई उद्धार गरिएको छ।

सेनाका अनुसार चैत्र ३ गते संखुवासभा जिल्ला को मकालु गाउँपालिका–१, वालुङ्ग निवासी गर्भवती तथा सुत्केरी महिलालाई जटिल स्वास्थ्य समस्या देखिएपछि तत्काल उद्धार गरिएको हो।

उक्त महिलालाई थप उपचारका लागि नेपाली सेनाको हवाई साधनमार्फत काठमाडौं ल्याइएको नेपाली सेनाले जनाएको छ। दुर्गम क्षेत्रमा रहेका गर्भवती तथा सुत्केरी महिलालाई समयमै उपचार सेवा उपलब्ध गराउने उद्देश्यले यस्तो हवाई उद्धार कार्यक्रम सञ्चालन हुँदै आएको छ।

उक्त कार्यक्रमले जोखिममा रहेका महिलाको ज्यान जोगाउन महत्वपूर्ण भूमिका खेलेको उल्लेख गर्दै आवश्यक परेमा यस्ता उद्धार कार्यलाई थप प्रभावकारी बनाउँदै लैजाने जनाएको छ।