शिक्षक र प्राध्यापकको राजनीतिक संलग्नताप्रति शिक्षा मन्त्रीकाे चेतावनी

काठमाडौं, कार्तिक २४ । शिक्षा, विज्ञान तथा प्रविधि मन्त्रालयका मन्त्री महावीर पुनले सरकारी सेवामा कार्यरत शिक्षक, प्राध्यापक र कर्मचारीहरूलाई शिक्षण संस्थाभित्र राजनीतिक गतिविधिमा संलग्न नहुन आग्रह गरेका छन्। मन्त्रालयका मन्त्री महावीर पुनको हस्ताक्षरयुक्त पत्रमा यस विषयमा मन्त्रालयको गम्भीर ध्यानाकर्षण भएको उल्लेख गर्दै पेशागत आचरण र शिष्टाचारको पालना गर्न निर्देशन दिइएको छ।

मन्त्रीका अनुसार पछिल्ला दिनमा नेपाल शिक्षक महासंघ, त्यसमा आबद्ध विभिन्न शिक्षक संघ–संगठन र विश्वविद्यालयका प्राध्यापक तथा कर्मचारीका पेशागत संस्थाहरू राजनीतिक गतिविधिमा संलग्न भएको जनगुनासो बढेको छ। यस्ता क्रियाकलापले पेशागत कर्तव्य, सेवाको शिष्टाचार र व्यावसायिक आचरणविपरीत कार्य भएको भन्दै मन्त्रालयले आपत्ति जनाएको हो।

पत्रमा भनिएको छ, “शिक्षण संस्था भित्र राजनीतिक गतिविधिमा संलग्नता कायम पार्न नपाइने विषयमा समित र मन्त्रालयको नीति स्पष्ट रहेको छ।” मन्त्रालयले यसअघि पनि सम्बन्धित निकायहरूलाई ऐन विपरीतका गतिविधि रोक्न निर्देशन दिइसकेको उल्लेख छ।

मन्त्री पुनको पत्रमा थप भनिएको छ कि शिक्षक, प्राध्यापक र कर्मचारीका पेशागत संगठनहरूले कानुनले तोकेको सीमा नाघेर राजनीतिक गतिविधि गर्ने अभ्यास रोक्नुपर्छ। मन्त्रालयले स्पष्ट पारेको छ— सरकारी सेवामा कार्यरत शिक्षक र कर्मचारीले पेशागत एकाइका नाममा राजनीतिक दलको प्रचार–प्रसार, अधिवेशन वा प्रस्तावमा सहभागी हुने कार्य कानुनविपरीत हुनेछ।

मन्त्रालयले राजनीतिक दलका नियमावलीअनुसार गठन भएका शिक्षक र प्राध्यापकका संगठनहरूलाई कुनै पनि किसिमको आधिकारिक मान्यता नदिइएको जानकारीसमेत दिएको छ। साथै, शिक्षक–कर्मचारीको पेशागत एकता र अधिकारको विषयमा मन्त्रालय सजग रहेको बताउँदै, त्यस्ता हकअधिकारको प्रयोग गर्दा संयम र शालीनता अपनाउन आग्रह गरेको छ।

पत्रमा भनिएको छ, “आफ्नो पेशागत आचरण, नैतिक जिम्मेवारी, शिक्षा क्षेत्रको व्यावसायिकता र विद्यालय तथा विश्वविद्यालय प्रणाली सुदृढीकरणमा विपरित असर पर्ने गरी पेशागत संगठनका नाममा राजनीतिक संलग्नता कायम गर्न नहुने विषय मन्त्रालयले पुनः सबैलाई जानकारी गराएको छ।”

मन्त्रालयले शिक्षा प्रणालीको गुणस्तर सुधार, व्यावसायिकता र नैतिक जिम्मेवारीलाई प्राथमिकता दिन सबै शिक्षक, प्राध्यापक र कर्मचारीलाई पेशागत मर्यादाभित्र रही काम गर्न आह्वान गरेको छ।