काठमाडौंका नदीकिनारका जोखिमपूर्ण वस्ती खाली गराइने

काठमाडौं, वैशाख १६ । जिल्ला प्रशासन कार्यालय काठमाडौंले नदी किनारका अनधिकृत तथा जोखिमपूर्ण वस्तीहरू आगामी वैशाख १८ गते बिहान ७ बजेदेखि एकैपटक खाली गराउने भएको छ । सरकारी, सार्वजनिक तथा व्यक्तिगत जग्गा अतिक्रमण गरी बसोबास गर्दै आएका क्षेत्रलाई मानवीय उद्धार तथा विपद् जोखिमलाई मध्यनजर गर्दै प्रशासनले यस्तो निर्णय गरेको हो ।

प्रशासनले जारी गरेको अत्यन्त जरूरी सूचनाअनुसार काठमाडौं जिल्लाभरि विभिन्न स्थानहरूमा एकैपटक यो अभियान सञ्चालन हुनेछ । वस्तीवासीहरूलाई वैशाख १७ गते साँझसम्म घरटहरा पूर्ण रूपमा खाली गरिसक्न निर्देशन दिइएको छ ।

सूचनामा भनिएको छ, जोखिमपूर्ण वस्तीमा निर्मित घरटहरा तत्काल खाली गर्नुपर्नेछ । परिवारमा बिरामी, अशक्त, वृद्धवृद्धा, गर्भवती, सुत्केरी वा साना बालबालिका भए उनीहरूलाई पहिले सुरक्षित स्थानमा सार्नुपर्नेछ । उद्धारका लागि नेपाल प्रहरी, सशस्त्र प्रहरी, नगर प्रहरी र आवश्यकताअनुसार एम्बुलेन्सको सहायता उपलब्ध गराइने प्रशासनले जनाएको छ ।

यसैगरी, व्यक्तिगत मालसामान, लत्ताकपडा, पशुपंक्षी तथा चौपाया ढुवानी गर्न पनि सुरक्षाकर्मीको मद्दत लिन सकिनेछ । वास्तविक रूपमा आश्रय लिनुपर्ने व्यक्ति तथा परिवारलाई सरकारले व्यवस्थित स्थानमा बसोबासको प्रबन्ध गर्ने जनाइएको छ । साथै, वास्तविक भूमिहीन व्यक्ति र परिवारको पहिचान गरी दिगो समस्या समाधानका लागि सम्बन्धित निकायले यथाशक्य छिटो टुंगो लगाउने प्रशासनको भनाइ छ ।

प्रशासनले नक्कली तथा अवास्तविक भूमिहीन भनिएका व्यक्ति र परिवारलाई कानूनी कारबाहीको दायरामा ल्याइने चेतावनी समेत दिएको छ । कोही पनि गलत हल्ला, दबाब, प्रभाव वा अफवाहको पछि नलाग्न आग्रह गरिएको छ । नागरिकको सुरक्षा, ज्यान तथा संविधान प्रदत्त हक अधिकार सुरक्षित हुने प्रतिबद्धता प्रशासनले जनाएको छ । वालबालिकाको शिक्षाको प्रबन्ध पनि सरकारको तर्फबाट हुने उल्लेख गरिएको छ ।

सरकारको यो अभियानमा सहयोग गर्नु सबैको कर्तव्य र जिम्मेवारी रहेको स्पष्ट पार्दै प्रशासनले सूचनालाई अटेर गरेको अवस्थामा घरटहरामा हुने थप क्षतिको जिम्मेवारी वस्तीवासी आफैं हुने समेत चेतावनी दिएको छ ।