ड्रोन प्रहारपछि दुबई विमानस्थलमा उडान अस्थायी रूपमा स्थगित

काठमाडौं, चैत २ । दुवई अन्तर्राष्ट्रिय विमानस्थल नजिकै रहेको इन्धन भण्डारण ट्यांकमा ड्रोन प्रहार भएपछि लागेको आगलागीका कारण सोमबार बिहान विमानस्थलको उडान सेवा अस्थायी रूपमा स्थगित गरिएको छ।
दुवई सिभिल एभियशन अथाेरिटीका अनुसार विमानस्थलको सुरक्षालाई ध्यानमा राख्दै सबै उडानहरू केही समयका लागि रोकिएको थियो। स्थानीय अधिकारीहरूले घटनापछि तत्काल उद्धार तथा नियन्त्रण टोली परिचालन गरी आगलागी नियन्त्रणमा ल्याएको राेयटर्सले बताएका छ ।
अधिकारीहरूका अनुसार ड्रोनले विमानस्थल नजिकैको एक इन्धन ट्यांकमा प्रहार गर्दा आगलागी भएको हो। आगोका कारण विमानस्थल आसपास धुवाँ देखिएको र सुरक्षाका कारण केही उडानहरू अन्य विमानस्थलतर्फ मोडिएको जनाइएको छ।
घटनापछि यात्रु तथा कर्मचारीको सुरक्षालाई प्राथमिकता दिँदै उडान सेवा रोकिएको थियो। केही समयपछि आगो नियन्त्रणमा आएपछि विमानस्थल सञ्चालन क्रमशः पुनः सुरु गर्ने तयारी गरिएको अधिकारीहरूले बताएका छन्।
घटनामा हालसम्म कुनै मानवीय क्षति नभएको बताइएको छ। घटनापछि विमान कम्पनीहरूले यात्रुलाई आफ्नो उडानको अवस्थाबारे सम्बन्धित एयरलाइन्ससँग जानकारी लिन आग्रह गरेका छन्।
क्षेत्रीय तनाव बढिरहेका बेला खाडी क्षेत्रमा विमानस्थल, तेल भण्डार तथा अन्य महत्वपूर्ण संरचनामा ड्रोन आक्रमणका घटनाहरू बढ्दै गएको अन्तर्राष्ट्रिय सञ्चारमाध्यमहरूले उल्लेख गरेका छन्।

विभिन्न एजेन्सीको सहयाेगमा