निरन्तरकाे युद्धबीच युद्धविरामको प्रयास, तर सहमति अझै टाढा

काठमाडौं, चैत २३ । अमेरिका, इजरायल र इरानबीच जारी द्वन्द्वका बीच युद्धविरामको प्रयास तीव्र बने पनि तत्काल सहमति हुने सम्भावना अझै अनिश्चित देखिएको छ।
अन्तर्राष्ट्रिय सञ्चारमाध्यमहरूका अनुसार पाकिस्तान, चीनलगायत देशहरूको मध्यस्थतामा अमेरिका र इरानबीच युद्ध अन्त्य गर्ने प्रस्ताव अघि सारिएको छ। उक्त प्रस्तावमा तत्काल युद्धविराम, हर्मुज जलडमरू पुनः खोल्ने तथा दीर्घकालीन सम्झौताका लागि दुई चरणको वार्ता समावेश गरिएको बताइएको छ।
तर, इरानले अहिलेसम्म उक्त प्रस्तावमा स्पष्ट सहमति जनाएको छैन। उसले अमेरिकी प्रस्तावलाई ‘अत्यधिक र असन्तुलित’ भन्दै अस्वीकार गर्ने संकेत दिएको अल जजिराले जनाएको छ।

यसबीच अमेरिकी राष्ट्रपति डाेनाल्ड ट्रम्पलेले इरानलाई अल्टिमेटम दिँदै छिटो सहमति नगरे कडा सैन्य कारबाही गर्ने चेतावनी दिएका छन्। उनले इरानले हर्मुज जलडमरू नखोले ऊर्जा तथा पूर्वाधारमा ठूलो आक्रमण हुन सक्ने बताएकाे दि वाशिंटन पाेष्टले उल्लेख गरेकाे छ।

यद्यपि, केही कूटनीतिक स्रोतहरूका अनुसार ४५ दिनसम्मको अस्थायी युद्धविरामबारे पनि छलफल भइरहेको छ, जसले दीर्घकालीन सम्झौताका लागि आधार तयार गर्न सक्ने अनुमान गरिएको छ।

तर मैदानमा भने द्वन्द्व अझै चर्किंदो अवस्थामा छ। इजरायलले आक्रमण जारी राखेको छ भने इरानले पनि प्रतिकार गरिरहेको छ। दुवै पक्षको कठोर अडानका कारण तत्काल युद्धविराम हुने सम्भावना कमजोर देखिएको विश्लेषण गरिएको छ।
विश्लेषकहरूका अनुसार वर्तमान अवस्था “वार्ता र युद्ध सँगसँगै चलिरहेको” चरणमा पुगेको छ—जहाँ कूटनीतिक प्रयास भइरहे पनि विश्वासको कमी, कडा सर्तहरू र सैन्य दबाबका कारण सहमति तत्काल हुने सम्भावना न्यून छ
युद्धविरामको प्रयास सक्रिय छ, तर ट्रम्पको अल्टिमेटम, इरानको कडा अडान र मैदानमा जारी आक्रमणका कारण निकट भविष्यमा स्थायी सहमति हुने सम्भावना अझै अनिश्चित देखिन्छ।

एजेन्सीको सहयाेगमा