अबुधाबीको अब्जान क्षेत्रमा घाइते भएका ७ नेपालीमध्ये ६ जना डिस्चार्ज, एक जना खतरामुक्त

अबुधाबी, चैत २१ । नेपाली राजदूतावास, अबुधाबीले अब्जान क्षेत्रमा भएको एक घटनामा घाइते भएका ७ जना नेपाली नागरिकहरूको अवस्थाबारे जानकारी सार्वजनिक गरेको छ।

राजदूतावासका अनुसार, उक्त घटनामा घाइते भएका ७ जनामध्ये ६ जना सामान्य उपचारपछि अस्पतालबाट डिस्चार्ज भइसकेका छन्। बाँकी एक जना भने गम्भीर घाइते भएपनि खतरामुक्त अवस्थामा रहेको र उनको उपचार जारी रहेको राजदूतावासले जनाएको छ। ती व्यक्ति छिट्टै डिस्चार्ज हुने सम्भावना रहेको राजदूतावासले उल्लेख गरेको छ।

राजदूतावासले सबै घाइते व्यक्तिहरूसँग टेलिफोन तथा ४ जनासँग प्रत्यक्ष भेट गरी उनीहरूको अवस्थाबारे जानकारी लिएको जनाएको छ। आवश्यक सहयोग र समन्वयका लागि राजदूतावास निरन्तर क्रियाशील रहेको र युएई सरकारले उनीहरूको आवश्यक स्वास्थ्य उपचार गरिरहेको समेत जानकारी गराइएको छ।

त्यस्तै, वर्तमान परिस्थितिलाई मध्यनजर गर्दै राजदूतावासले संयुक्त अरब इमिरेट्स (युएई) मा रहेका सम्पूर्ण नेपाली नागरिकहरूलाई युएई सरकारले जारी गरेको सुरक्षासम्बन्धी मार्गदर्शन तथा सूचनाहरूको पूर्ण रूपमा पालना गर्न आग्रह गरेको छ। साथै, आधिकारिक स्रोतबाट प्रकाशित सूचनाहरूमा मात्र विश्वास गर्न र तदनुसार सचेत रहन पनि सबैमा अनुरोध गरिएको छ।

नेपाली राजदूतावास, अबुधाबीले यो जानकारी गराउँदै सबैलाई सतर्कता अपनाउन अपिल गरेको छ।