एकैदिन दुई स्थानमा अख्तियारको कारबाही : प्रहरी नायब निरीक्षक र अदालत डिठ्ठा घुससहित पक्राउ

काठमाडौँ / गौर, चैत १७ । अख्तियार दुरुपयोग अनुसन्धान आयोगले एकैदिन दुई फरक स्थानमा कारबाही गर्दै प्रहरी नायब निरीक्षक र जिल्ला अदालतका डिठ्ठालाई घुससहित नियन्त्रणमा लिएको छ।

आज काठमाडौँ र रौतहटमा छुट्टाछुट्टै टोली खटाई आयोगले यी कारबाही गरेको हो।

काठमाडौँमा प्रहरी नायब निरीक्षक पक्राउ

प्रहरी वृत्त मालीगाउँ काठमाडौंमा कार्यरत प्रहरी नायब निरीक्षक दिनेश राउतलाई आयोगको टंगाल कार्यालयबाट खटिएको टोलीले काठमाडौं महानगरपालिका वडा नं. ०५ स्थित गहनापोखरीबाट रू. २० हजार घुससहित पक्राउ गरेको छ।

उनले बैंकिङ्ग कसुरसम्बन्धी मुद्दामा जाहेरवालाको रकम फिर्ता दिलाइदिन सहजीकरण गरिदिएवापत र मुद्दा मिलापत्र गर्ने प्रयोजनका लागि सेवाग्राहीसँग घुस मागी दुःख हैरानी दिएको उजुरीका आधारमा कारबाही गरिएको आयोगले जनाएको छ।

रौतहटमा अदालत डिठ्ठा पक्राउ

यसैगरी, जिल्ला रौतहट, गौर नगरपालिकास्थित रौतहट जिल्ला अदालत, गौरमा कार्यरत डिठ्ठा लव कुमार सिंहलाई आयोगको हेटौडा कार्यालयबाट खटिएको टोलीले अदालत परिसरबाटै रू. ५० हजार घुससहित नियन्त्रणमा लिएको छ।

डिठ्ठा सिंहले अदालतको फैसलाबमोजिम दाखिला खारेजी (दा.खा.) पुर्जी गरी जग्गा फुकुवा गराइदिएवापत सेवाग्राहीसँग घुस माग गरिरहेको सूचना तथा उजुरीको आधारमा कारबाही गरिएको हो।

दुवै जनाको साथबाट घुसबापतको रकम र मोबाइल थान-१ बरामद गरिएको छ। उनीहरूमाथि थप अनुसन्धान भइरहेको अख्तियार दुरुपयोग अनुसन्धान आयोगका प्रवक्ता सुरेश न्यौपानेले जानकारी दिएका छन्।