बुढीगण्डकी बाढीबाट ९५ जनाको उद्धार, ३५ जनालाई काठमाडौं ल्याइयो

काठमाडौं, असोज २५। गोरखाको बुढीगण्डकी नदीमा आएको बाढीबाट प्रभावित क्षेत्रबाट नेपाली सेनाले हालसम्म ९५ जनाको उद्धार गरी सुरक्षित स्थानमा स्थानान्तरण गरेको छ।
नेपाली सेनाका अनुसार उद्धारका लागि चारवटा हेलिकोप्टर र स्थलमार्गबाट सेना परिचालन गरिएको छ। उद्धार गरिएकामध्ये नौ विदेशी नागरिकसहित ३५ जनालाई गोरखाको आरुघाटबाट काठमाडौं ल्याइएको छ।
प्रभावित क्षेत्रमा अन्य सुरक्षा निकाय तथा सम्बन्धित सरोकारवालासँगको समन्वयमा खोज तथा उद्धार कार्य जारी रहेको सेनाले जनाएको छ।
बाढीले आरुघाट–धादिङ जोड्ने मोटरेबल पुल बगाएपछि उक्त स्थानमा बेलिब्रिज जडान गर्ने तयारीका लागि नेपाली सेनाको इन्जिनियरिङ टोलीसमेत परिचालन गरिएको छ।