तामाकोशी सललल

⠿ drag

काठमाडौं, जेठ १ । दोलखा जिल्लाका पर्यटकीय आकर्षणहरुलाई उजागर गर्ने तथा दोलखाबारे ध्यानाकर्षण गर्ने उद्देश्य राखी निर्माण गरिएको सांगीतिक प्रस्तुति ‘तामाकोशी सललल’ को उद्घाटन राजधानीमा आज एक कार्यक्रमका बीच प्रसिद्ध लोकगायक कुमार बस्नेतबाट भएको छ । 

बीबी फुँयालद्वारा रचना गरिएको उक्त गीतको गायत कल्याण सिंह र सुनिता थेगिमबाट भएको छ । यसरी नै श्रव्यदृष्यमा प्रमुख भूमिका सोल गुरुङ र बद्रि प्रसाद तिवारीले निर्वाह गरेका छन् । बीबी डिजिटलको प्रस्तुति रहेको यस गीतलाई युट्युबमा सुन्न सकिन्छ । 

कार्यक्रमका बीच प्रमुख अतिथी कुमार बस्नेतको अभिनन्दन पनि गरिएको थियो । अभिनन्दित बस्नेतले आफू काठमाडौंमा जन्मिएको भएपनि हुर्केको ठाउँ दोलखाको जिरीमा भएको तथा दोलखाको बारेमा थुप्रै गीत गाएको भएपनि दोलखाबाट सम्मानित भएको यो पहिलो पटक भनी कृतज्ञता व्यक्त गर्नु भयो । यसरी नै सम्मानित व्यक्तित्व टेक बहादुर जिरेलले गीतकार बीबी फुँयालको आफ्नो विद्यार्थी रहेको र आफ्नो विद्यार्थीले गरेको प्रगतिमा सन्तोष व्यक्त गर्नु भयो ।