प्रधानमन्त्री संसदमा अनुपस्थित भएपछि प्रतिनिधिसभा बैठकमा नाराबाजी र अवरोध, बैठक १५ मिनेटका लागि स्थगित

काठमाडौं, वैशाख ३०। प्रतिनिधिसभाको बैठकमा प्रधानमन्त्री बालेन्द्र शाह अनुपस्थित भएपछि सत्ता र प्रतिपक्षबीच चर्काचर्की तथा नाराबाजी भएपछि बैठक केही समयका लागि स्थगित भएको छ ।
प्रतिनिधि सभाकाे कार्ययाेजनाअनुसार आज प्रधानमन्त्री शाहले नीति तथा कार्यक्रममा आजको संसदमा जवाफ दिएपछि आजकै वैठकमा निर्णयार्थ पेश गरिने बताइएको थियाे ।
संसदमा लगातार अवरोध भएपछि प्रतिनिधि सभाका सभामुख डाेल प्रसाद अर्यालले प्रतिपक्ष सांसदहरूलाई बाेल्ने समय दिइएको थियाे ।
संसदमा प्रतिपक्षी नेपाली कांग्रेसका अर्जुननरसिंह केसीले संसदमा प्रधानमन्त्रीकाे उपस्थिति माग गर्दै देशलाई कार्यदिशा दिने महत्त्वपूर्ण नीति तथा कार्यक्रम प्रस्तुत गर्दा, पढ्दापढ्दै हिंड्ने, जनताकाे आवाज नसुन्ने र जवाफ दिन पनि नआउनु राम्रो नभएकाे बताए ।
यस्तै, राप्रपाका नेता ज्ञानेन्द्र शाहीले जनताको उत्तरदायित्व संसदबाट खाेजिन्छ, रत्नपार्कबाट हाेइन भन्दै प्रधानमन्त्रीले जनताको आवाज नै सुन्न नचाहनु ठीक नभएकाे बताए । प्रधानमन्त्री महत्त्वपूर्ण दिनमा संसदमा नै आउन नभ्याउने, " याेभन्दा व्यस्त कहाँ हाे?" भन्ने प्रश्न गर्दै राष्ट्रिय स्वतन्त्र पार्टीका १८१ सांसदकाे अस्तित्व नै संकटमा परेकाे बताए ।
सभामुख तथा रास्वपा नेताहरूले संसदीय नियमावली देखाउँदै प्रधानमन्त्री काे अनुपस्थितिलाई छाेप्न खाेजेकाे सन्दर्भलाई शाहीले भने, प्रचलनमा प्रधानमन्त्री बिरामी भए, विदेश गएकाे अवस्थामा मात्रै नियमावली आकर्षित हुने स्पष्ट पारे ।
नीति तथा कार्यक्रमकाे रूलिङ तथा जवाफ दिन विना जानकारी अनुपस्थित भएकाेमा असन्तुष्टि व्यक्त गर्दै प्रश्न गरे- आफैले सुन्न, जवाफदेही हुन नसक्ने नीति तथा कार्यक्रम भन्ने पनि हुन्छ ?
यस्तै, अर्का सांसद युवराज दुलालले पाँच वर्षसम्म पनि प्रधानमन्त्रीकाे आवाज सुन्न नपाईने हाे भन्ने प्रश्न गर्दै संसदीय उत्तरदायित्वकाे कुरालाई खिल्ली उडाइएकाे बताए ।

राष्ट्रपति रामचन्द्र पाैडेलले गत साेमबार आर्थिक वर्ष २०८३/८४ काे सरकारकाे नीति तथा कार्यक्रम संसदकाे संयुक्त वैठकमा प्रस्तुत गरेका थिए । उक्त दिन पनि प्रधानमन्त्री शाह बैठक नसक्दै निस्केर हिंडेका थिए ।

स्थिति तनावपूर्ण बन्दै गएपछि सभामुखले सबै सांसदलाई संयमित हुन आग्रह गर्दै बैठक १५ मिनेटका लागि स्थगित गरेको घोषणा गरेका थिए ।