वरिष्ठता उल्लंघन गर्दै चौथो वरियताका न्यायाधीश शर्मा प्रधानन्यायाधीश सिफारिस

काठमाडौं, वैशाख २४ । संवैधानिक परिषद्ले नेपालको न्यायिक इतिहासमै पहिलो पटक वरिष्ठतम् न्यायाधीशलाई पछि पार्दै चौथो वरियताका सर्वोच्च अदालतका न्यायाधीश डा. मनोजकुमार शर्मालाई प्रधानन्यायाधीश नियुक्तिका लागि सिफारिस गरेको छ।
प्रधानमन्त्री कार्यालयमा आज बसेको परिषद् बैठकले डा. शर्मालाई ३३औं प्रधानन्यायाधीश बनाउन सिफारिस गरेको हो। कार्यवाहक प्रधानन्यायाधीश सपना प्रधान मल्ल, वरिष्ठ न्यायाधीश कुमार रेग्मी र हरि फुयाललाई पछि पार्दै डा. शर्माले मौका पाएका हुन्।
परिषद्का सदस्य नारायण दाहाल र भीष्मराज आङदम्बेले भने यस निर्णयमा असहमति जनाएका छन्। संसदीय सुनुवाइ समितिले नाम अनुमोदन गरेमा डा. शर्मा प्रधानन्यायाधीश बन्नेछन्। २०२७ साल असार ४ गते जन्मिएका उनको उमेर ६५ वर्ष २०९२ सालमा पुग्नेछ, तर ६ वर्षे पूरै कार्यकाल गरेर उनी २०८९ वैशाखसम्म पदमा रहने छन्।