आर्थिक कूटनीति र डिजिटल सेवा प्रवाहमा जोड दिन नियोगहरूलाई निर्देशन

काठमाडौं, वैशाख ७। परराष्ट्र मन्त्रालय ले युरोप र अमेरिकास्थित नेपाली कूटनीतिक नियोगहरूलाई आर्थिक कूटनीति सुदृढ पार्न र सेवा प्रवाहलाई डिजिटल तथा नवप्रवर्तनमैत्री बनाउन निर्देशन दिएको छ।
परराष्ट्रमन्त्री शिशिर खनाल ले सरकारले अघि सारेको सुशासन र आर्थिक समृद्धिका लक्ष्य हासिल गर्न नियोगहरूले आफ्नो कामलाई नतिजामुखी बनाउनु पर्नेमा जोड दिए। उनले विशेषगरी सेवा प्रवाह सुधार, नवप्रवर्तनको प्रयोग र डिजिटलीकरणमार्फत सेवामा पहुँच र प्रभावकारिता बढाउन आग्रह गरे।
कार्यक्रममा परराष्ट्र सचिव अमृत बहादुर राई ले प्रविधिमा आधारित सेवा प्रवाह र प्रभावकारी आर्थिक कूटनीतिलाई सरकारको प्राथमिकतासँग जोडेर अघि बढाउनुपर्ने धारणा राखे।
अन्तरक्रियामा सहभागी विभिन्न देशस्थित राजदूत, स्थायी प्रतिनिधि, महावाणिज्यदूत तथा अन्य कूटनीतिक अधिकारीहरूले आफ्ना नियोगका प्रमुख गतिविधि, सहकार्यका अवसर, सेवा प्रवाहको अवस्था र अन्तर्राष्ट्रिय मञ्चमा सहभागिताबारे जानकारी गराएका थिए।
मन्त्रालयका अनुसार उक्त अन्तरक्रिया शृंखलामार्फत नियोगहरूको कार्यसम्पादनलाई सरकारका प्राथमिकतासँग थप समन्वय गर्ने उद्देश्य राखिएको छ।