परराष्ट्र मन्त्रालयद्वारा कूटनीतिक नियोगसँग भर्चुअल अन्तरक्रिया, आर्थिक कूटनीति र सुशासनमा जोड

काठमाडौं, वैशाख ४ । परराष्ट्र मन्त्रालयले दक्षिण एशिया, उत्तर–पूर्वी एशिया तथा दक्षिण–पूर्वी एशिया र प्रशान्त क्षेत्रमा रहेका नेपाली कूटनीतिक नियोगहरूसँग भर्चुअल अन्तरक्रिया कार्यक्रम आयोजना गरेको छ।

कार्यक्रममा परराष्ट्र मन्त्री शिशिर खनालले सेवा प्रवाह सुधारमार्फत सुशासन सुनिश्चित गर्ने र आर्थिक कूटनीतिलाई सुदृढ बनाउँदै देशको समृद्धिमा योगदान गर्ने सरकारको प्राथमिकता रहेको उल्लेख गरे। उनले कूटनीतिक नियोगहरूलाई सोहीअनुसार कार्यसम्पादन गर्न र नवप्रवर्तन तथा डिजिटल प्रविधिको प्रयोगमार्फत सेवा प्रवाह थप प्रभावकारी बनाउन निर्देशन दिएका छन्।

कार्यक्रमको उद्घाटन गर्दै परराष्ट्र सचिव अमृतबहादुर राईले सरकारका दुई प्रमुख प्राथमिकता—प्रविधिमा आधारित सेवा प्रवाहसहितको सुशासन र प्रभावकारी आर्थिक कूटनीतिमा जोड दिएका थिए।

अन्तरक्रियामा सहभागी राजदूत, महावाणिज्यदूत तथा चार्ज द’अफेयर्सहरूले सम्बन्धित देश तथा अन्तर्राष्ट्रिय निकायहरूसँग नेपालको सहकार्य, सहकार्य विस्तारका अवसरहरू तथा सेवा प्रवाहको अवस्थाबारे जानकारी गराएका थिए।