मतदाता नामावली सङ्कलन कार्यक्रम चैत २२ गतेदेखि सुचारु हुने

काठमाडौँ, चैत १८ । निर्वाचन आयोगले प्रतिनिधिसभा सदस्य निर्वाचन, २०८२ को लागि स्थगन गरिएको मतदाता नामावली सङ्कलन तथा अद्यावधिक कार्यक्रम आगामी चैत २२ गतेदेखि पुनः सुचारु गर्ने निर्णय गरेको छ । आयोगको आजको बैठकले उक्त निर्णय गरेको हो ।

आयोगका अनुसार राष्ट्रिय परिचयपत्र नम्बर प्राप्त गरेका नेपाली नागरिकले आफ्नो राष्ट्रिय परिचयपत्रको विवरणमार्फत अनलाइन प्रणालीबाटै मतदाता नामावलीमा नाम दर्ता गर्न सक्नेछन् । राष्ट्रिय परिचयपत्र प्रणालीमा आबद्ध नभएका नागरिकले भने आयोगको ‘प्रि–इनरोलमेन्ट’ प्रणालीमार्फत अनलाइन फारम भरी आफ्नो फोटो तथा औंठाछापसहितको जैविक विवरण दिन प्रदेश वा जिल्ला निर्वाचन कार्यालयमा स्वयं उपस्थित हुनुपर्नेछ ।

यसैगरी, मतदाता नामावलीमा रहेको त्रुटि सच्याउने (नाम, थर, ठेगाना; एकै वडाभित्र दुई वा सोभन्दा बढी मतदान स्थल रहेकोमा पायक पर्ने स्थानमा नाम सार्ने; नागरिकताअनुसारको विवरण नभई अन्यथा भएमा सच्याउने), दोहोरो नाम हटाउने, मृत्यु तथा बसाइसराइको विवरण अद्यावधिक गर्ने कार्य पनि अनलाइन माध्यमबाट गर्न सकिने व्यवस्था मिलाइएको आयोगले जनाएको छ ।