फरार प्रतिवादी काठमाडौंबाट पक्राउ, करिब ८० लाख बिगोका मुद्दा दर्ता

काठमाडौं, चैत १० । नेपाल प्रहरी अन्तर्गत काठमाडौं उपत्यका अपराध अनुसन्धान कार्यालय ले फरार रहेका एक प्रतिवादीलाई पक्राउ गरेको छ।
कार्यालयले जारी गरेको प्रेस विज्ञप्तिअनुसार बैंकिङ कसुरसम्बन्धी मुद्दामा संलग्न रही फरार रहेका रञ्जिता बस्नेतलाई काठमाडौं महानगरपालिका–६ बाट पक्राउ गरिएको हो। काठमाडौं जिल्ला अदालतबाट पक्राउ अनुमति प्राप्त भई फरार रहेकी बस्नेतलाई खोजतलासका क्रममा नियन्त्रणमा लिइएको प्रहरीले जनाएको छ।
पक्राउ परेकी बस्नेत ३७ वर्षकी हुन्। उनी दोलखा जिल्ला बैतेश्वर गाउँपालिका–१ स्थायी घर भई हाल काठमाडौं महानगरपालिका–४ बसोबास गर्दै आएकी थिइन्।
प्रहरीका अनुसार बस्नेतविरुद्ध विभिन्न कार्यालयहरूमा बैंकिङ कसुर तथा चेक अनादरसम्बन्धी ९ वटा मुद्दा दर्ता रहेका छन्। ती मुद्दामध्ये केही जिल्ला प्रहरी परिसर काठमाडौं तथा विभिन्न प्रहरी वृत्तहरूमा दर्ता भएका छन् भने वैदेशिक रोजगार विभागमा समेत मुद्दा रहेको उल्लेख गरिएको छ।
उक्त मुद्दाहरूमा गरी कुल बिगो रकम करिब ८० लाख १५ हजार ५ सय रुपैयाँ रहेको प्रहरीले जनाएको छ।
पक्राउ परेकी बस्नेतलाई आवश्यक अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ।