काठमाडौं, पुस ३० । नेपाल ललितकला प्रज्ञा प्रतिष्ठानया समकालीन चित्रकला विभाग, बहुआयामिक तथा अन्य सिर्जनात्मक कला विभाग तथा इसेन्स अफ मुलर्यानीया सहकार्यय् ‘आर्ट इन हिमालय २०२६’ अन्तर्राष्ट्रिय कला प्रदर्शनी मंगलबारनिसें न्ह्यात ।
प्रदर्शनीया उलेज्या एकेडेमीया चान्सलर नारदमणि हरतांछाली व मुलर्यानीया हेड अफ एसेन्स लोरा डी। मर्फीं यानादीगु खः ।
ज्याझ्वलय् एकेडेमिया चान्सलर नारदमणि हरतांछालीं थुगु ब्वज्यां नेपाः व विदेशया कलाकारपिनिगु कलाकृतिलिसे सांस्कृतिक आदान प्रदान यायेत थप ग्वाहालि जुइगु खँ कनादीगु खः ।
एकेडेमीया समकालीन चित्रकला विभागया प्रमुख संजय बन्तवा राई नं थुगु प्रदर्शनीइ हिमालय व तराईया चित्रत, पूर्वी बिम्ब व मिथकया चित्रत दुथ्याःगु व थुकिं अन्तर्राष्ट्रिय भ्रातृत्व नं स्थापित जुइगु खँ कनादिल ।
आयरिश कलाकार व मुलर्यानीया हेड अफ एसेन्स लोरा डी मर्फीं ३० दँ न्ह्यः न्हापांखुसी नेपाः वःगु इलंनिसें हे नेपालं थःत तसकं मतिना याःगु खँ कनादिसें प्रदर्शनीइ ब्वति काःपिं सकल कलाकारपिन्त सुभाय् देछानादीगु खः ।
ब्वज्याया क्यूरेटर प्रदीप शाक्यं कलाया भाषा छगू शक्तिशाली संचारया माध्यम जूगु धासें थुगु ब्वज्याय् नेपाः व मेमेगु देय्या प्रयोगात्मक कला नं दुथ्याःगु जानकारी बियादिल ।
उगु ब्वज्याय् नेपाः, अमेरिका, अष्ट्रेलिया, बेलायत, डेनमार्क, क्यानाडा व आयरल्याण्डया १५ म्ह विदेशी कलाकारपिनिगु ८० स्वयां अप्वः कलाकृति दु ।
ज्याझ्वलय् नेपाल ललितकला प्रज्ञा प्रतिष्ठानया पुलांम्ह चान्सलर किरण मानन्धर, प्रज्ञा प्रतिष्ठानया पदाधिकारी, मूलर्यानीया एसेन्सया नेपाल संयोजक डिल्ली तुलाधरलिसें वरिष्ठ व न्हूगु पुस्ताया कलाकार, थीथी संघसंस्थाया प्रतिनिधि, पत्रकार लगायतया उपस्थिति दुगु खः । ब्वज्या मघ १ गते तक न्ह्याइ ।
मेगु पोस्त: नेवाः टाइम्स
Comments (0)
No comments yet
Be the first to comment!
Write a Comment