राष्ट्रिय लोककला तथा परम्परागत चित्रकला सम्मेलन सुरू

काठमाडौं, भदौ १६ । नेपाल ललितकला प्रज्ञा—प्रतिष्ठानको आयोजनामा सोमवारबाट ‘राष्ट्रिय लोककला, परम्परागत चित्रकला तथा शिल्प—हस्तकला सम्मेलन २०८२’ सुरु भएको छ । सम्मेलनको प्रतिष्ठानका कुलपति नारदमणि हार्तम्छाली तथा अग्रज कलाकार श्यामवदन श्रेष्ठले संयुक्त रूपमा उद्घाटन गरेका थिए ।

कार्यक्रममा कुलपति नारदमणि हार्तम्छालीले ललितकलामा सौन्दर्यशास्त्र, उपयोगिता र संस्कृति, यी तीन पक्षमा त्रिकोणात्मक सन्तुलन राखी छलफल हुनपर्ने बताए । कलामार्फत देशको समृद्धिको विचार मन्थन गर्ने सम्मेलनमा सातै प्रदेशका प्रतिनिधिको उत्साहजनक सहभागिता रहेको थियाे ।

उपकुलपति लालकाजी लामाले यस सम्मेलनले नेपाली ललितकला क्षेत्रका उन्नयनमा थप सहयोग गर्ने तथा सबैको हातेमालोबाट यस अभियानले सार्थकता पाउने बताए ।

सदस्य सचिव देवेन्द्रकुमार काफ्ले ‘थुम्केली’ले ललितकला तथा पर्यटनसँग कृषि, प्रकृति र संस्कृतिलाई जोडेर लैजानुपर्ने बताउँदै सिर्जनशील उद्योगको विकासमा सहयोग पुग्ने विचार व्यक्त गरे । साथै विरासतदेखिको संस्कृतिको पुस्तान्तरण र नवयुगको संस्कृति निर्माणमा यस सम्मेलनले थप सहयोग गर्ने सदस्य सचिवकाे धारणा थियाे ।

शिल्प—हस्तकला विभाग प्रमुख अरुणा हिङमाङले नेपालका शिल्प—हस्तकलाको संरक्षण, सुरक्षा, विकास र पुस्तान्तरणका माध्यमबाट आधुनिनीकरण र बजारीकरणलगायतका विषयमा छलफल गर्नु यस सम्मेलनको मुख्य उद्देश्य भएको बताए ।

जानकी गाउँपालिका अध्यक्ष गणेश चौधरीले थारू बाहुल्य रहेको कैलाली जिल्लामा थारू लोक कलाको अध्ययन, अनुसन्धान तथा अभिलेखीकरणका साथै संरक्षण तथा संर्वधन हुन जरुरी रहेको बताए ।

कलाकार श्यामवदन श्रेष्ठले देशका विभिन्न समुदायद्वारा सिर्जित ललितकलाको बजारीकरण, संरक्षण, प्रवद्र्धन र विकासमा सबैले जोड दिनुपर्ने बताइन् ।

समारोहमा प्रतिष्ठान प्राज्ञपरिषद् सदस्य, प्राज्ञसभा सदस्य, अग्रज कलाकार, विभिन्न सङ्घ—संस्था/क्षेत्रलाई प्रतिनिधित्व गर्ने कलाकार, पत्रकार, अनुसन्धातालगायतकोे उपस्थिति रहेको थियो ।