सबै भूमिहीन र आवासविहीन परिवारलाई एकीकृत प्रक्रियाबाट आवास अधिकार सुनिश्चित गर्नुपर्नेमा जोड

काठमाडौं, असार ३२ । काठमाडौँ महानगरपालिकाकी कार्यवाहक प्रमुख सुनिता डंगोलले ‘भूमिहीन दलित’, ‘भूमिहीन सुकुम्बासी’, ‘अव्यवस्थित बसोबासी’ र ‘स्वबासी’बीच कुनै विभेद नगरी सबैलाई समान रूपमा आवासको अधिकार सुनिश्चित गर्नुपर्ने बताएकी छन्।
काठमाडौँ महानगरपालिका र भूमि समस्या समाधान समितिबीच भएको दोस्रो बैठकमा उनले एउटै समय, एउटै संयन्त्र, एउटै प्रक्रिया र एउटै व्यवस्थामार्फत सबै लक्षित समुदायको आवास सम्बन्धी अधिकार सुनिश्चित गर्नुपर्ने धारणा राखिन्।
डंगोलले आवासको अधिकार सुनिश्चित नभएका परिवारप्रति समान दृष्टिकोण अपनाउनुपर्ने उल्लेख गर्दै, “हामी ‘भूमिहीन दलित’, ‘भूमिहीन सुकुम्बासी’, ‘अव्यवस्थित बसोबासी’ र ‘स्वबासी’लाई विभेद गर्न सक्दैनौँ। अहिले जग्गामा अधिकार दिन खोजिएको हो कि आवासको अधिकार सुनिश्चित गर्न खोजिएको हो भन्ने विषय स्पष्ट हुनुपर्छ,” भनिन्।
उनले समस्या समाधानको केन्द्रबिन्दु जग्गाको स्वामित्वभन्दा नागरिकको दिगो आवास अधिकार हुनुपर्नेमा जोड दिँदै कारण वा अवस्था जे भए पनि आवासको अधिकारबाट वञ्चित परिवारलाई समान व्यवहार गरिनुपर्ने बताइन्।
बैठकमा भूमि समस्या समाधान समितिका अध्यक्ष बलभद्र बास्तोलासहित समितिका सदस्य तथा अव्यवस्थित बसोबासको चाप रहेका काठमाडौँ महानगरपालिकाका वडाध्यक्षहरूको सहभागिता रहेको थियो। बैठकमा भूमिहीन, सुकुम्बासी तथा अव्यवस्थित बसोबासीको समस्या समाधानका लागि समन्वयात्मक र दीर्घकालीन ढंगले अघि बढ्ने विषयमा छलफल भएको जनाइएको छ।