नेपाल आयल निगमले भाेलिदेखि १४.२ केजी सिलिन्डरमा पनि ग्यास दिने

काठमाडौं, असार ३०। नेपाल आयल निगमले एलपी ग्यासको आपूर्ति तथा वितरणलाई सहज बनाउन अस्थायी रूपमा ७.१ केजीका सिलिन्डरको सट्टा १४.२ केजी क्षमताका सिलिन्डरमा ग्यास भर्ने व्यवस्था लागू गर्ने भएको छ।
निगमले सोमबार जारी गरेको प्रेस विज्ञप्तिअनुसार भारतीय आयल निगमका विभिन्न बोटलिङ प्लान्ट तथा रिफाइनरीमा देखिएको लोडिङ समस्या सुधार हुँदै गए पनि बजारमा १४.२ केजी ग्यास सिलिन्डरको उच्च मागलाई मध्यनजर गर्दै २०८३ असार ३१ गतेदेखि मुलुकभर नै १४.२ केजी सिलिन्डरमा साविककै परिमाणको ग्यास भरेर पूर्ण मूल्य २ हजार ६० रुपैयाँ मा बिक्री–वितरण गरिने व्यवस्था मिलाइएको जनाएको छ।
यसअघि निगमले आपूर्ति प्रणालीलाई व्यवस्थित बनाउन २०८२ मंसिर २१ गतेदेखि अर्को निर्णय नभएसम्म ७.१ केजी एलपी ग्यास भरी बिक्री–वितरण गर्ने व्यवस्था लागू गरेको थियो।
निगमका अनुसार केही समयका लागि ७.१ केजी सिलिन्डर पूर्ण रूपमा प्रतिस्थापन नहुने भएकाले बजारमा ७.१ र १४.२ केजी दुवै प्रकारका सिलिन्डर बिक्री–वितरण हुन सक्नेछन्। उपभोक्तालाई सिलिन्डरको तौल र मूल्य यकिन गरेर मात्र ग्यास खरिद गर्न आग्रह गरिएको छ।
निगमले भारतीय आयल कर्पोरेसनबाट नियमित रूपमा एलपी ग्यास आयात भइरहेकाले आवश्यकताअनुसार मात्र ग्यास खरिद गर्न तथा अनावश्यक भण्डारण नगर्न पनि उपभोक्तासँग अनुरोध गरेको छ।