भिमसेनस्थानमा बिहान सबेरै आगलागी, करोडौंको क्षति

काठमाडौं, असोज १३ । राजधानीको भिमसेनस्थानमा आज बिहान करिब ३ बजे भीषण आगलागी भएको छ। आगो कपडाको पसलबाट सुरु भएको अनुमान गरिएको छ, जसले छिट्टै वरिपरिका पसल र गोदाममा फैलिँदा ठूलो धनमाल जलेर नष्ट भएको छ।

स्थानीयवासी र प्रहरीसँगै काठमाडौं उपत्यकाका विभिन्न स्थानबाट पठाइएका दमकलहरूले संयुक्त रूपमा करिब दुई घण्टापछि आगो नियन्त्रणमा लिएका थिए। आगलागीका कारण मानवीय क्षति नभएको तर प्रारम्भिक अनुमानअनुसार करोडौं रुपैयाँ बराबरको सामान जलेर नष्ट भएको प्रहरीले जनाएको छ।

आगो लाग्ने कारण खुल्न बाँकी भए पनि विद्युत् शर्टसर्किटकै कारण हुनसक्ने अनुमान गरिएको छ। घटनाबारे थप अनुसन्धान भइरहेको प्रहरीले जनाएको छ।