सर्पदंशबाट चार महिनामै ५६ जनाको मृत्यु, जनचेतना बढाउन विज्ञहरूको जोड

काठमाडौं, साउन २१ — राष्ट्रिय विपद् जोखिम न्यूनीकरण तथा व्यवस्थापन प्राधिकरण (एनडीआरआरएमए) ले सर्पदंशबाट हुने मानवीय क्षति न्यूनीकरणका उपायबारे सरोकारवाला निकायका प्रतिनिधिसँग छलफल गरेको छ।
छलफलमा सर्पदंशबाट भइरहेको मानवीय क्षति, मनसुनका बेला सर्पदंशका घटना बढ्नुका कारण, टोकाइ कम गर्ने उपाय, सर्पले टोकेपछि तत्काल अपनाउनुपर्ने सावधानी तथा सर्पदंश न्यूनीकरणका रणनीतिबारे विस्तृत छलफल भएको थियो।
कार्यक्रममा सहभागी विज्ञहरूले सर्पदंशका घटनालाई कम गर्न समुदायस्तरमा व्यापक जनचेतना अभियान सञ्चालन गर्नुपर्ने, स्वास्थ्यकर्मीलाई नियमित तालिम दिनुपर्ने तथा उपचार उपलब्ध हुने स्वास्थ्य संस्थाबारे सर्वसाधारणलाई पर्याप्त जानकारी गराउनुपर्नेमा जोड दिएका थिए।
प्राधिकरणका अनुसार २०८३ वैशाख १ गतेदेखि साउन २१ गतेसम्म देशका ६४ जिल्लामा सर्पदंशका ७६८ घटना दर्ता भएका छन्। ती घटनामा ५६ जनाको मृत्यु भएको छ भने ७१९ जना घाइते भएका छन्।
तथ्यांकअनुसार सर्पदंशका घटनाको संख्या सबैभन्दा बढी कञ्चनपुर जिल्लामा रहेको प्राधिकरणले जनाएको छ।
प्राधिकरणले मनसुनको समयमा सर्पदंशको जोखिम बढ्ने भएकाले स्थानीय तह, स्वास्थ्य संस्था र समुदायबीच समन्वय बढाएर जनचेतना तथा समयमै उपचार सेवामा पहुँच विस्तार गर्नुपर्ने आवश्यकता औँल्याएको छ।