देशभर आजदेखि बालबालिकालाई भिटामिन ‘ए’ र जुकाको औषधि खुवाउने अभियान सुरु

काठमाडौं, वैशाख ६ । नेपाल सरकारले ५ वर्षमुनिका बालबालिकाको स्वास्थ्य संरक्षणलाई प्राथमिकता दिँदै आजदेखि देशव्यापी रूपमा भिटामिन ‘ए’ र जुकाको औषधि खुवाउने अभियान सुरु गरेको छ। बैशाख ६ र ७ गते सञ्चालन हुने यस अभियानमार्फत देशभरका लाखौं बालबालिकालाई लक्षित गरिएको छ।
प्रधानमन्त्रीको सचिवालयले “बालबालिकाको स्वास्थ्य, हाम्रो पहिलो प्राथमिकता” भन्ने नारासहित अभिभावकलाई आफ्ना नानीबाबुलाई नजिकैको स्वास्थ्य संस्था वा महिला सामुदायिक स्वास्थ्य स्वयंसेविकामार्फत औषधि खुवाउन आग्रह गरेको छ।
स्वास्थ्यकर्मीका अनुसार भिटामिन ‘ए’ ले बालबालिकाको दृष्टि क्षमता सुधार्नुका साथै रोग प्रतिरोधात्मक क्षमता बढाउन सहयोग गर्छ। त्यस्तै, जुकाको औषधिले पेटका परजीवी नष्ट गरी पोषण अवस्थालाई सुधार गर्न महत्वपूर्ण भूमिका खेल्ने बताइएको छ।
सरकारले विगतदेखि नियमित रूपमा सञ्चालन गर्दै आएको यस अभियानले बाल मृत्युदर घटाउन र कुपोषण नियन्त्रणमा उल्लेखनीय योगदान पुर्‍याउँदै आएको छ। अभिभावकलाई तोकिएको मिति र स्थानमा अनिवार्य रूपमा सहभागी भई बालबालिकाको स्वास्थ्य सुरक्षामा साथ दिन आग्रह गरिएको छ।