स्वास्थ्य सेवा प्रभावित नहुने गरी विदाकाे व्यवस्था मिलाइने

काठमाडौँ, चैत २७ । नेपाल सरकारले मन्त्रिपरिषद्को निर्णयअनुसार शनिबार र आइतबार लगातार दुई दिन सार्वजनिक विदा दिने व्यवस्था लागू गरेको सन्दर्भमा स्वास्थ्य तथा जनसङ्ख्या मन्त्रालयले स्वास्थ्य सेवा निर्बाध रूपमा सञ्चालन गर्न आवश्यक व्यवस्था मिलाउन सम्बन्धित निकायलाई निर्देशन दिएको छ।

मन्त्रालयका सहप्रवक्ता डा. समीरकुमार अधिकारीद्वारा जारी पत्रमा अस्पतालहरूले आइतबारको दिन आफ्नो कार्यभार (वर्कलोड) र जनशक्तिको अवस्था हेरी बहिरङ्ग सेवा (ओपीडी) सञ्चालन गर्नुपर्ने व्यवस्था मिलाउन भनिएको छ।

साथै, यो व्यवस्था लागू गर्दा कर्मचारीहरूलाई हप्तामा शनिबारबाहेक अर्को एक दिन गरी जम्मा दुई दिन विदा दिने व्यवस्था मिलाउन र विदा दिन नसकिने अवस्थामा सट्टा बिदा उपलब्ध गराउन निर्देशन दिइएको छ।

प्रादेशिक अस्पतालहरूमा समेत सोही व्यवस्था लागू गर्न सातै प्रदेशको स्वास्थ्य विषय हेर्ने मन्त्रालयलाई अनुरोध गरिएको मन्त्रालयले जनाएको छ।

नयाँ व्यवस्थाअनुसार शनिबार र आइतबार सरकारी कार्यालयमा विदा भए तापनि आपत्कालीन तथा आवश्यक स्वास्थ्य सेवा भने प्रभावित हुन नदिने गरी तयारी गरिएको मन्त्रालयको भनाइ छ।