मन्त्रिपरिषद्काे चार निर्णय, कार्यविभाजन नियमावलीदेखि भूमि सम्बन्धी संशोधनसम्म स्वीकृत

काठमाडौं, वैशाख ३० । सरकारले कार्यविभाजन नियमावलीदेखि भूमि सम्बन्धी संशोधनसम्मका विभिन्न महत्त्वपूर्ण निर्णय गरेको छ ।
आज बसेको मन्त्रिपरिषद्को बैठकले नेपाल सरकार (कार्यविभाजन) नियमावली, २०८३ स्वीकृत गर्ने निर्णय गरेको छ । उक्त नियमावलीमार्फत मन्त्रालय तथा निकायहरूको कार्यक्षेत्र र जिम्मेवारीलाई थप व्यवस्थित बनाइने जनाइएको छ ।
बैठकले विद्युतीय सुशासनलाई प्रभावकारी बनाउन ‘विद्युतीय सुशासन आयोग गठन तथा सञ्चालन आदेश, २०७९’ मा आवश्यक संशोधन गर्ने निर्णय पनि गरेको छ । सरकारले डिजिटल प्रणालीमार्फत सार्वजनिक सेवा प्रवाहलाई थप चुस्त र प्रभावकारी बनाउने उद्देश्यले संशोधन अघि बढाएको बताइएको छ ।
यस्तै, सरकारी लगानी व्यवस्थापन समितिको सदस्यमा प्रतिनिधि सभाका सदस्य सुशील खड्का र योगेश गौचन थकालीलाई मनोनयन गरिएको छ । खड्का बागलुङ तथा गौचन मुस्ताङबाट निर्वाचित सांसद हुन् ।
मन्त्रिपरिषद्ले भूमि सम्बन्धी (एकाइसौँ संशोधन) नियमहरू, २०८३ लाई पनि स्वीकृति प्रदान गरेको छ । सरकारले भूमि प्रशासन तथा व्यवस्थापनलाई समयानुकूल बनाउन संशोधित नियम लागू गर्ने तयारी गरेको जनाएको छ ।