मनसुन पूर्वतयारीका लागि राष्ट्रिय कार्ययोजना बन्ने, १८ सदस्यीय कार्यदल गठन

काठमाडौँ, चैत १७ । राष्ट्रिय विपद् जोखिम न्यूनीकरण तथा व्यवस्थापन प्राधिकरणले मनसुन पूर्वतयारी तथा प्रतिकार्य राष्ट्रिय कार्ययोजना, २०८३ तर्जुमाका लागि १८ सदस्यीय कार्यदल गठन गरेको छ।

प्राधिकरणको नीति, योजना तथा अनुगमन महाशाखा प्रमुख (सहसचिव) को संयोजकत्वमा गठित उक्त कार्यदलमा विपद् सम्बद्ध संघीय मन्त्रालय, विभाग तथा प्राधिकरणका साथै तीनवटै सुरक्षा निकायका प्रतिनिधिहरू समावेश छन्।

सम्भावित मनसुनजन्य विपद्को प्रभावकारी सामना गर्दै धनजनको क्षति न्यूनीकरण गर्ने उद्देश्यले संघ, प्रदेश, स्थानीय तह, सुरक्षा निकाय, साझेदार संस्थाहरू लगायत विपद्सँग सम्बन्धित सबै सरोकारवाला निकायलाई पूर्वतयारी तथा प्रतिकार्यमा योजनाबद्ध ढङ्गले लाग्न सकियोस् भन्नका लागि हरेक वर्ष कार्ययोजना तयार हुँदै आएको प्राधिकरणले जनाएको छ।