सुनकाे भाउ आज पनि घट्याे, तोलाको रू. २३९,९०० मा कारोबार

काठमाडौं, कार्तिक १० । नेपाल सुनचाँदी व्यवसायी महासंघले आज आइतबार (कार्तिक १० गते) का लागि तोकेको दर अनुसार छापावाल सुन (९९९९) को मूल्य तोलाको रु २३९,९०० कायम गरिएको छ।

महासंघका अनुसार चाँदीको मूल्य तोलाको रू. २,९८० निर्धारण गरिएको छ।

गत केही दिनयता अन्तर्राष्ट्रिय बजारमा सुनको मूल्यमा उतार–चढाव जारी रहेकाले नेपाली बजारमा पनि यसको प्रत्यक्ष प्रभाव परेको महासंघका अधिकारीहरूको भनाइ छ। हाल अमेरिकी अर्थतन्त्र, मध्यपूर्व तनाव र केन्द्रीय बैंकहरूको नीति सम्बन्धी अनिश्चितताका कारण विश्व बजारमा सुनको मूल्य अस्थिर रहँदै आएको छ।

नेपालमा दशैं–तिहारपछि सुनको खरिदबिक्री केही सुस्त भए पनि लगानीका रूपमा यसको माग स्थिर रहेको व्यवसायीहरूको धारणा छ। नेपाल सुनचाँदी व्यवसायी महासंघले दैनिक दर तोक्ने गरेको छ, जुन विश्व बजार मूल्य, विनिमय दर र स्थानीय माग–आपूर्तिको अवस्थामाथि निर्भर रहने गर्छ।

महासंघका अनुसार उपभोक्ताहरूले दर हेरी मात्र सुनचाँदी खरिद गर्न र आधिकारिक सटही पसलबाट मात्रै कारोबार गर्न सुझाव दिइएको छ।