भारी वर्षा, बाढी–पहिरो र हिमपातको जोखिम : डिमानद्वारा उच्च सर्तकता अपनाउन अपिल

काठमाडौं, असोज ९ । आगामी असोज ९ गतेदेखि ११ गतेसम्म देशभर भारी वर्षा, बाढी, पहिरो र हिमपातको जोखिम रहेको भन्दै राष्ट्रिय प्रकोप व्यवस्थापन संजाल नेपाल (डिमान) ले उच्च सर्तकता अपनाउन अपिल गरेको छ।

जल तथा मौसम विज्ञान विभागको पूर्वानुमान अनुसार बंगालको खाडीको पूर्वी भाग आसपास विकसित न्यून चापीय प्रणालीका कारण मुलुकका विभिन्न भागमा भारी वर्षा हुन सक्ने तथा त्यसबाट बाढी, पहिरो र उच्च हिमाली क्षेत्रमा हिमपातको जोखिम बढ्न सक्ने अवस्था रहेको डिमानले जनाएको छ।

विशेषगरी नदी तथा खोलानाला आसपासका क्षेत्र, पहाडी तथा भिरालो भूभाग र उच्च हिमाली क्षेत्रमा उच्च सर्तकता आवश्यक देखिएको छ। केही समयअघि मात्र रसुवा–भोटेकोशी क्षेत्रमा आएको विनाशकारी बाढीबाट ठूलो जनधनको क्षति भएको र प्रभावित समुदाय अझै कठिन परिस्थितिमा रहेको स्मरण गराउँदै डिमानले पुनः यस्तो जोखिम देखिनु चिन्ताको विषय भएको जनाएको छ।

यस संवेदनशील परिस्थितिमा डिमानले आम नागरिक, समुदाय, स्थानीय तह, सरकारी निकाय, नागरिक समाज तथा मानवीय संस्थाहरूलाई आवश्यक पूर्वतयारी र सर्तकता अपनाउन हार्दिक अपिल गरेको छ।

संस्थाले आम नागरिकलाई विशेष अनुरोध गर्दैदै
अत्यावश्यक कामबाहेक जोखिमपूर्ण यात्रा तथा हिँड्डुल नगर्न, नदी–खोला तथा बाढी–पहिरोको जोखिम भएका स्थानमा नजान, जोखिमयुक्त क्षेत्रमा बसोबास गरिरहेकाहरूले समयमै सुरक्षित स्थानमा जान, बालबालिका, ज्येष्ठ नागरिक, अपाङ्गता भएका व्यक्ति, गर्भवती महिला लगायत संवेदनशील समूहको विशेष सुरक्षा गर्न भनेकाे छ ।

यस्तै, सदस्य संस्था तथा नागरिक संघसंस्थालाई आह्वान गर्दै डिमानले आफ्ना सम्पूर्ण सदस्य संस्था, नागरिक संघसंस्था, स्थानीय साझेदार तथा स्वयंसेवकहरूलाई आ-आफ्नो कार्यक्षेत्र र समुदायमा रहेको जोखिमको अवस्थाबारे निरन्तर जानकारी राख्न, समुदायलाई समयमै सूचित गर्न तथा स्थानीय र सम्बन्धित सरकारी निकायसँग समन्वय गरी आवश्यक मानवीय सहयोगका लागि तयारी अवस्थामा रहन अनुरोध गरेको छ।

साथै, विपद्को समयमा अफवाह तथा अपुष्ट सूचना प्रवाह नगर्न र आधिकारिक स्रोतबाट प्राप्त सूचना मात्र सम्प्रेषण गर्न पनि डिमानले सबैमा अनुरोध गरेको छ।