शुक्लाफाँटा राष्ट्रिय निकुञ्जमा सम्पर्कविहीन भएका १७ महिला सकुशल फेला

काठमाडौं, साउन ४ । शुक्लाफाँटा राष्ट्रिय निकुञ्जभित्र प्रवेश गरेपछि सम्पर्कविहीन भएका १७ जना महिला सकुशल फेला परेका छन्।

नेपाली सेनाका अनुसार साउन ३ गते निकुञ्जभित्र प्रवेश गरेका ती महिलासँग सम्पर्क विच्छेद भएपछि सोही रातिदेखि नेपाली सेना, निकुञ्ज प्रशासन तथा अन्य सुरक्षा निकायको संयुक्त टोलीले व्यापक खोजी तथा उद्धार अभियान सञ्चालन गरेको थियो।

खोजी अभियानका क्रममा साउन ४ गते बिहान तीन जना महिलालाई निकुञ्जभित्रबाट सकुशल उद्धार गरी आफन्तको जिम्मा लगाइएको नेपाली सेनाले जनाएको छ। बाँकी १४ जना महिला भने आफैं परिवारको सम्पर्कमा आएका छन्।

नेपाली सेनाले खोजी तथा उद्धार अभियानमा निकुञ्ज प्रशासनसँग समन्वय गरी संयुक्त रूपमा परिचालन गरिएको जनाएको छ। घटनामा सबै १७ जना महिला सकुशल फेला परेपछि खोजी अभियान सम्पन्न भएको छ।