काठमाडौं, असोज ११ । बंगालको खाडीमा उत्पन्न न्यून चापीय प्रणालीका कारण २०८३ असोज ८ गतेदेखि ११ गतेसम्म देशका विभिन्न भागमा भारी वर्षा भएको छ । राष्ट्रिय विपद् जोखिम न्यूनीकरण तथा व्यवस्थापन प्राधिकरण (NDRRMA) ले आइतबार जारी गरेको प्रेस नोटअनुसार उक्त वर्षाका कारण हालसम्म २१ जनाको मृत्यु, ५ जना बेपत्ता र ५ जना घाइते भएका छन् । ७४७ परिवार प्रत्यक्ष प्रभावित भएका छन् ।
नेपाल मौसम विज्ञान विभागबाट संभावित भारी वर्षाको पूर्वानुमान बुलेटिन प्रकाशित भएलगत्तै प्राधिकरणबाट पूर्वतयारी तथा प्रतिकार्यका लागि तयारी अवस्थामा रहन प्रेस नोट/इमेल/एसएमएस जारी गरिएको थियो । दिनको तीन पटक अद्यावधिक सूचना सम्प्रेषण गरिएको थियो ।
गत ४ दिनको निरन्तर वर्षाका कारण देशभरका १८६ स्टेशनहरुमा १०० मि.मि. भन्दा बढी कुल वर्षा रेकर्ड भएको छ । सबैभन्दा बढी वर्षा नवलपरासी (बर्दघाट सुस्ता पूर्व) को डेढगाउँमा ५४४.२ मि.मि. रेकर्ड भएको छ, त्यसपछि कास्कीको पञ्चासे (५००.२ मि.मि.) र तनहुँको अत्रौलीटार (४७२ मि.मि.) रहेका छन् ।
यसैगरी केन्द्रीय मनसुन प्रतिकार्य कमाण्ड पोष्टको बैठक हरेक दिन बसी परिस्थितिको समीक्षा गर्नुका साथै आवश्यक निर्णय लिइ तत्काल सम्बन्धित निकाय र रेस्पोन्डरहरुमा जानकारी गराइएको थियो । जोखिम देखिएका जिल्लामा आवश्यकताअनुसार सवारी आवागमनमा रोक लगाउन निर्देशन दिइयो । जिल्ला विपद् व्यवस्थापन समिति एवं स्थानीय तहबाट संभावित प्रभावित जिल्लामा विद्यालय बिदा दिइयो ।
भारी वर्षा सुरु भएपछि प्राधिकरणको सिचुएसन रुमबाट निरन्तर ७६ घण्टा (२०८३ असोज ८ गते बिहान ९ बजेदेखि २०८३ असोज ११ गते १ बजेसम्म) मौसम अवस्थाको अनुगमन, संचार तथा समन्वयका काम भए । सिचुएसन रुमबाट यस अवधिमा प्रतिकार्यमा अग्रपंक्तिमा खटिने (responders) हरुसहितलाई ५ हजारभन्दा बढी एसएमएस पठाइएकाे थियो ।
यस अवधिमा जल विज्ञान तथा जलस्रोत अनुसन्धान केन्द्रको बाढी पूर्वानुमान महाशाखाबाट संभावित बाढी प्रभावित स्थानका वासिन्दाहरुलाई सुसूचित गर्न २ लाख १४ हजार एसएमएस पठाइएकाे थियो । ७७ वटै जिल्ला प्रशासन कार्यालय, तीनवटै सुरक्षा निकायलगायतलाई तयारी अवस्थामा रहन निर्देशन गरिएको थियो । पर्वतारोहण तथा पदयात्रामा गएका पर्यटकलाई लक्षित गरी अंग्रेजी भाषामा समेत सतर्कता सूचना जारी गरिएकाे थियो । जोखिमयुक्त क्षेत्रमा रहेका पर्यटकलाई सुरक्षित स्थानमा आउन र सुरक्षित स्थानमा रहेका पर्यटकलाई सोही स्थानमा रहन अनुरोध गरियो । उक्त अवधिमा देशभर करिब ९ हजार पर्यटक एवं पदयात्री यात्रारत थिए ।
विपद् प्रतिकार्यका लागि सरकारका सबै यन्त्र परिचालित भए । बाढी र पहिरोको जोखिममा परेका विभिन्न प्रभावित जिल्लाका गरी करिब २ हजार मानिसहरुलाई सुरक्षित स्थानमा सारिएको छ । उद्धार गरिएका मानिसहरुका लागि सम्बन्धित जिल्ला प्रशासनको समन्वयमा स्थानीय तहमार्फत आवश्यक बन्दोबस्ती तथा राहतको व्यवस्था गरिएको जनाएको छ । जाजरकोट, म्याग्दी, बाग्लुङलगायतका जिल्लामा हेलिकोप्टरमार्फत बाढी र पहिरोमा फसेका व्यक्तिहरुको उद्धार गरिएको प्राधिकरणले जनाएको छ ।
अन्य लेखहरू: नेवाः टाइम्स
Comments (0)
No comments yet
Be the first to comment!
Write a Comment