संसद्लाई थप प्रभावकारी र मर्यादित बनाउन दलहरूबीच सहकार्य आवश्यक : कार्यव्यवस्था परामर्श समिति

काठमाडौं, साउन २०। प्रतिनिधि सभाको कार्यव्यवस्था परामर्श समितिको बैठकले संसद्को कार्यसम्पादनलाई थप प्रभावकारी, व्यवस्थित, मर्यादित र जनउत्तरदायी बनाउन राजनीतिक दलहरूबीच निरन्तर संवाद, सहकार्य र समन्वयलाई सुदृढ बनाउनुपर्नेमा जोड दिएको छ।

सभामुख डोलप्रसाद (डीपी) अर्यालको सभापतित्वमा बुधबार बसेको समितिको बैठकमा प्रतिनिधि सभाको आगामी संसद् क्यालेन्डर, संसद् बैठकलाई थप प्रभावकारी, व्यवस्थित र परिणाममुखी बनाउने विषय तथा संसदीय कार्यप्रणालीलाई सुदृढ बनाउने उपायबारे विस्तृत छलफल भएको सभामुखको सचिवालयले जनाएको छ।

बैठकमा सांसदहरूले पालना गर्नुपर्ने आचरण, संसद् बैठकमा अपनाउनुपर्ने पोशाकसम्बन्धी व्यवस्था, कार्यसूची व्यवस्थापन, संसदीय गतिविधिलाई नियमित, व्यवस्थित र प्रभावकारी बनाउने उपाय तथा सदन सञ्चालनसँग सम्बन्धित समसामयिक विषयमा आफ्ना धारणा र सुझाव प्रस्तुत गरेका थिए।

छलफलका क्रममा संसद्को गरिमा, मर्यादा र प्रभावकारिता अभिवृद्धि गर्दै जनअपेक्षाअनुरूप संसदीय कार्यसम्पादन सुनिश्चित गर्न सबै राजनीतिक दलबीच निरन्तर संवाद, सहकार्य र समन्वयलाई अझ सुदृढ बनाउनुपर्नेमा जोड दिइएको थियो।

बैठकमा सहभागी सदस्यहरूले संसद्को कार्यसम्पादनलाई थप प्रभावकारी, मर्यादित र जनउत्तरदायी बनाउन सबै पक्षले आफ्नो भूमिका जिम्मेवारीपूर्वक निर्वाह गर्नुपर्नेमा समेत जोड दिएका थिए।