पर्यटन प्रवर्द्धनमा सरकार तीव्र गतिमा अघि बढेको छ, होटल व्यवसायीको चिन्ता हट्छ : प्रधानमन्त्री

काठमाडौं, असार ३१ । प्रधानमन्त्री वालेन्द्र शाहले नेपालको पर्यटन प्रवर्द्धनका लागि सरकारले द्रुत गतिमा काम अघि बढाइसकेकाले होटल व्यवसायीहरूको चिन्ता अब अन्त्य हुने बताएका छन्।
प्रधानमन्त्री तथा मन्त्रिपरिषद्को कार्यालयमा बुधबार होटल संघ नेपाल (हान) का पदाधिकारीसँग भएको छलफलमा प्रधानमन्त्री शाहले निजी क्षेत्रलाई राज्यको बलियो साझेदारका रूपमा अघि बढ्न आग्रह गरे।
संस्कृति, पर्यटन तथा नागरिक उड्डयन मन्त्री खडकराज पौडेलको उपस्थितिमा भएको बैठकमा प्रधानमन्त्री शाहले व्यवसायीलाई कानुनको पालना गर्न, साना तथा मझौला होटललाई दर्ता गरी करको दायरामा ल्याउन तथा सार्वजनिक–निजी साझेदारी (पीपीपी) मोडेलमा सहकार्यको सम्भावना अध्ययन गर्न आग्रह गरे।
छलफलमा हानका पदाधिकारीले नेपालको होटल उद्योग वार्षिक ४० लाख पर्यटकलाई सेवा दिन सक्ने क्षमता भए पनि हाल करिब १२ लाख पर्यटक मात्र आइरहेको जानकारी दिए। पर्यटकको संख्या बढाउन सके आन्तरिक रोजगारी वृद्धि हुने र नेपाली युवाको वैदेशिक रोजगारीप्रतिको निर्भरता घटाउन सकिने उनीहरूको भनाइ थियो।
उनीहरूले नेपालमा आरोग्य पर्यटन, गन्तव्य विवाह (डेस्टिनेसन वेडिङ) तथा क्रस–बोर्डर पर्यटनको पर्याप्त सम्भावना रहेको उल्लेख गर्दै होटल उद्योगलाई उत्पादनमूलक उद्योगसरह विद्युत् महसुलमा सहुलियत दिन, संक्षिप्त वातावरणीय मूल्याङ्कन (आईईई) को सीमा २५ शय्याबाट ५० शय्यासम्म पुर्‍याउन तथा पोखरा र भैरहवा अन्तर्राष्ट्रिय विमानस्थल पूर्ण रूपमा सञ्चालनमा ल्याई नेपाल एयरलाइन्सको सेवा सुधार गर्न सरकारसँग माग गरे।
त्यसैगरी, वैदेशिक लगानी तथा प्रविधि हस्तान्तरण ऐन, २०७५ मा रहेको ट्रेडमार्क रोयल्टीको ५ प्रतिशत सीमा संशोधन गरी आपसी समझदारीमा शुल्क निर्धारण गर्ने व्यवस्था गर्न, डेस्टिनेसन वेडिङका लागि गरगहना ल्याउने प्रक्रिया सहज बनाउन तथा आरोग्य पर्यटन प्रवर्द्धनका लागि ‘फुल स्टोरी टेलिङ’ प्याकेज र आवश्यक विज्ञको व्यवस्था गर्न पनि हानले सरकारसँग आग्रह गरेको छ।