गाली बेइज्जती मुद्दाका प्रतिवादी खेम भण्डारी पक्राउ

कञ्चनपुर, असार १८ । गाली बेइज्जती सम्बन्धी मुद्दामा अदालतबाट दोषी ठहर भएका कञ्चनपुरको भीमदत्त नगरपालिका–१८ निवासी ५० वर्षीय खेम भण्डारी पक्राउ परेका छन्।
जिल्ला प्रहरी कार्यालय कञ्चनपुरका अनुसार जिल्ला अदालत कञ्चनपुर तथा उच्च अदालत दिपायल–महेन्द्रनगर इजलासबाट भएको फैसला कार्यान्वयनका लागि भण्डारीलाई भीमदत्त नगरपालिका–१८ स्थित पुष्पलाचोकबाट पक्राउ गरिएको हो।
जिल्ला अदालत कञ्चनपुरले भण्डारीलाई एक महिना कैद र १० हजार रुपैयाँ जरिवानाको फैसला सुनाएको थियो। उक्त फैसला उपर उच्च अदालत दिपायल–महेन्द्रनगर इजलासले थप सात दिन कैद र दुई हजार एक सय रुपैयाँ जरिवाना हुने फैसला गरेको थियो।
अदालतले पीडित निवेदक किरण बिष्टलाई एक लाख रुपैयाँ क्षतिपूर्ति उपलब्ध गराउन पनि आदेश दिएको थियो।
पक्राउ परेका भण्डारीलाई फैसला कार्यान्वयनका लागि जिल्ला अदालत कञ्चनपुरमा पेश गरिएको प्रहरीले जनाएको छ।