थापाथलीका टहरा भत्काइयो, २५ जना विस्थापित: काठमाडौं महानगरपालिका

काठमाडौं, वैशाख १२ । काठमाडौं महानगरपालिकाले अव्यवस्थित बस्ती व्यवस्थापनअन्तर्गत थापाथलीस्थित वागमती नदी किनाराका घरटहरा पूर्णरूपमा भत्काइसकेको जनाएको छ। महानगरका अनुसार दिउँसो २ बजेसम्म सो क्षेत्रबाट २५ जना घरबारविहीन भएको विवरण टिपाइएको छ।

उनीहरूमध्ये ७ परिवारका ८ पुरुष, १२ महिला र ५ बालबालिकालाई सुन्दरीघाटस्थित राधास्वामी सत्संग आश्रममा लगिएको छ भने एक सुत्केरीलाई कोटेश्वर पुर्याइएको छ। सिनामंगल गैरीगाउँमा टहरा भत्काउने क्रममा ३ परिवारले घरबारविहीन भएको विवरण टिपाएको र दुई अस्वस्थ बालकलाई अस्पताल पुर्याइएको महानगरले उल्लेख गरेको छ।

यसैगरी, जिल्ला प्रहरी परिसर भक्तपुरका प्रहरी उपरीक्षक सूर्यबहादुर खड्काका अनुसार मनोहरा क्षेत्रको नदी किनारामा संरचना बनाएर बस्नेमध्ये करिब ८० प्रतिशत बासिन्दा आफ्नो सामानसहित बस्ती छाडिसकेका छन्। बाँकी रहेका परिवारले पनि सामान ओसार्ने कार्य जारी राखेको उनले जानकारी दिए। यस बस्तीमा ७७७ घरटहरामा करिब एक हजार ६०० भन्दा बढी मानिस बसोबास गर्दै आएका थिए।

विस्थापितका सामान ओसार्न महानगरपालिकाका १२ ठुला र ४ साना गाडी प्रयोग भएको छ।