इद्-उल-फित्रको अवसरमा प्रधानमन्त्री कार्कीको शुभकामना सन्देश

काठमाडौं, चैत ७। प्रधानमन्त्री सुशीला कार्कीले इस्लाम धर्मावलम्बीहरूको महान पर्व इद्-उल-फित्रको अवसरमा देश तथा विदेशमा रहेका सम्पूर्ण मुस्लिम समुदायमा हार्दिक शुभकामना व्यक्त गरेकी छन्।
इद्-उल-फित्रका अवसरमा शुभकामना सन्देश जारी गर्दै उनले रमजान महिनाको लामो व्रतले सहनशीलता, सहिष्णुता, त्याग र मानवताप्रतिको समर्पणको सन्देश दिने उल्लेख गरेकी छन्। उनले यो समयलाई सत्कर्म र संयमको महिना भन्दै यस्ता मूल्यहरूले समाजमा सहअस्तित्व र समृद्धिका लागि प्रेरणा दिने विश्वास व्यक्त गरेकी छन्।
प्रधानमन्त्री कार्कीले इद्-उल-फित्रले आपसी सद्भाव, भाइचारा र एकताको भावना अझ सुदृढ बनाउने उल्लेख गर्दै यस पर्वले नेपाली समाजबीच आपसी सम्मान र सहकार्यको भावना अभिवृद्धि गर्ने अपेक्षा राखेकी छन्।
उनले यस पावन अवसरले राष्ट्रको समृद्धि र स्थायित्वमा योगदान पुर्‍याओस् भन्ने कामना गर्दै सम्पूर्ण मुस्लिम समुदायलाई ‘इद् मुबारक’ शुभकामना व्यक्त गरेकी छन्।
यसैबीच, रास्वपा नेपालका वरिष्ठ नेता तथा आगामी प्रधानमन्त्रीका दावेदार नेता बालेन्द्र शाह, बालेनले पनि सामाजिक सञ्जालमार्फत धर्म, संस्कृति र विविधताको सम्मान गर्दै सद्भाव, सहिष्णुता र आपसी सहकार्यबाट नै देश अघि बढ्ने उल्लेख गरेका छन् ।
एक–अर्काप्रति सम्मान, समझदारी र एकताले समाजलाई अझ सुदृढ बनाउनेछ भन्ने कामना गर्दै, ईदको यस पावन अवसरले भाइचारा, प्रेम र मेलमिलापको भावना अझ प्रगाढ बनाउने अपेक्षासहित
"ईद मुबारक" दिएका छन् ।