भोटेकोशी बाढी : ७ सय ३४ शव फेला, २ हजार ४ सय ९८ जना सम्पर्कविहीन

काठमाडौं , भदौ १४ । राष्ट्रिय विपद जोखिम न्यूनीकरण तथा व्यवस्थापन प्राधिकरणले भोटेकोशी बाढीमा परी हालसम्म ७ सय ३४ शव फेला परिसकेका छन् भने २ सय ४२ जना घाइते भएका छन् । यस्तै, २ हजार ४ सय ९८ जना सम्पर्कविहीन रहेको जनाएको छ ।

प्राधिकरणका अनुसार सबैभन्दा बढी रसुवामा ५ सय ६२, चितवनमा २ सय ५९ र नवलपरासी पूर्वमा १ सय ८४ जनाको शव फेला परेको छ । त्यस्तै, ५ सय ८९ विदेशी नागरिक अझै सम्पर्कविहीन छन् । विदेशी पर्यटकसँगै घुम्न गएका १ सय २७ नेपाली पनि बेपत्ता छन् ।

उद्धारमा १९ हजार ८ सय ९५ सुरक्षाकर्मी परिचालन गरिएको छ । नेपाली सेना, प्रहरी र सशस्त्र प्रहरीले गरी ८ हजार १ सय ८६ जनाको उद्धार गरिसकेका छन् । जलविद्युत आयोजनाको सुरुङबाट २ सय ७९ जनालाई हेलिकप्टरमार्फत उद्धार गरिएको छ । यस्तै, २ सय २७ विदेशी नागरिकलाई हेली उद्धार गरिएको छ ।

सरकारले १५ पालिकालाई ६ करोड ७५ लाख रुपैयाँ नगद राहत वितरण गरेको छ । रसुवा र नुवाकोटलाई १–१ करोड तथा धादिङलाई ५० लाख रुपैयाँ उपलब्ध गराइएको छ । खाद्य तथा गैरखाद्य सामग्रीका ३७ ट्रक र हेलिकप्टरबाट थप राहत सामग्री पठाइएको छ ।

पहिचान नखुलेका शवहरू २१ अस्पतालमा राखिएका छन् । सम्पूर्ण विवरण प्राधिकरणको फेसबुक पेज र नेपाल प्रहरीको युडीबी पोर्टलमा उपलब्ध गराइएको छ । इन्धन व्यवस्थापनका लागि डिजेल, पेट्रोल र हवाई इन्धनको मौज्दात रहेको प्राधिकरणले जनाएको छ ।