अविरल वर्षाले सप्तरीमा लगाइएको धानखेतीमा क्षति

सप्तरी, असार ३२ । अविरल वर्षाका कारण सप्तरी जिल्लाका विभिन्न स्थानीय तहमा करिब ७ सय ५४.८३ हेक्टर (झण्डै १,११४ बिगाहा) क्षेत्रफलमा लगाइएको तथा रोपाइँका लागि तयारी अवस्थामा रहेको धानखेतीमा क्षति पुगेको इन्सेकले जनाएको छ।
यही असार २७ गते रातिदेखि भएको वर्षासँगै खोलानाला तथा नहरमा पानीको बहाव बढ्दा र तटबन्ध कटान हुँदा धानबालीमा क्षति पुगेको कारण खेत डुबानमा परेकोले किसानहरु चिन्तित बनेका छन् ।
सप्तकोशी नगरपालिकाका प्रमुख कृष्णप्रसाद ढकालका अनुसार वडा नं. २, ४, ८ र १० हुँदै बग्ने टेंगरा खोलामा पानीको सतह बढ्दा वडा नं. २ र ४ मा करिब ५० बिगाहा (झण्डै ३३.८६ हेक्टर) क्षेत्रफलमा धानको बीउ गोडमेल गरिएको तथा रोपाइँका लागि तयारी अवस्थामा रहेको खेतमा क्षति पुगेको छ।यस्तै कञ्चनरूप नगरपालिका–९ का वडा अध्यक्ष रामसुन्दर यादवका अनुसार रोघनाथपुर क्षेत्रमा सुनेरी खोलाको बाढीले करिब ३० बिगाहा (झण्डै २०.३२ हेक्टर) क्षेत्रफलमा धानको बीउबालीमा क्षति पुर्‍याएको छ।
बोदेबरसाइन नगरपालिकाका प्रमुख आतेश सिंह यादवका अनुसार वडा नं. १, ३, ४, ५ र ७ मा पानीको निकास हुन नसक्दा करिब ३५ बिगाहा (झण्डै २३.७० हेक्टर) धानखेतीमा क्षति पुगेको छ।
त्यस्तै, छिन्नमस्ता गाउँपालिकाका अध्यक्ष विद्यानन्द चौधरीका अनुसार वडा नं. २, ३, ४, ५ र ६ मा पानी निकासको समस्या हुँदा करिब ८०० बिगाहा (झण्डै ५४१.८१ हेक्टर) क्षेत्रफलमा लगाइएको धानबाली डुबानमा परेको छ।
हनुमाननगर कंकालिनी नगरपालिकाका प्रमुख वीरेन्द्र माझिका अनुसार वडा नं. ८ मा करिब १०० बिगाहा (झण्डै ६७.७३ हेक्टर) रोपाइँका लागि तयारी अवस्थामा रहेको खेत डुबानमा परेको हो । साथै वडा नं. ११ मा वर्षाका कारण सडक भत्किएपछि तत्काल मर्मतसम्भार गरिएको छ।
राजविराज नगरपालिका–११ मा कोशी पम्प नहरको तटबन्ध कटान भएपछि करिब १०० बिगाहा (झण्डै ६७.७३ हेक्टर) क्षेत्रफलमा लगाइएको तथा रोपाइँका लागि तयारी अवस्थामा रहेको धानखेती प्रभावित भएको स्थानीय किसान ४७ वर्षीय सचिदानन्द यादवले बताए ।