आज देशका अधिकांश क्षेत्रमा वर्षाको सम्भावना, केही स्थानमा भारी वर्षा र हावाहुरीको चेतावनी

काठमाडौं, असार २२ । आज (सोमबार) देशका अधिकांश भू–भागमा मनसुनी गतिविधि सक्रिय रहने भएकाले मेघगर्जन तथा चट्याङसहित मध्यम वर्षाको सम्भावना रहेको छ। जल तथा मौसम विज्ञान विभागले केही स्थानमा भारी वर्षा र हावाहुरीसमेत चल्न सक्ने भएकाले आवश्यक सतर्कता अपनाउन आग्रह गरेको छ।
विभागका अनुसार आज दिउँसो देशका हिमाली र पहाडी भू–भागका केही स्थानमा मेघगर्जन तथा चट्याङसहित मध्यम वर्षा हुने सम्भावना छ। कोशी, बागमती, गण्डकी, लुम्बिनी र सुदूरपश्चिम प्रदेशका धेरै स्थान तथा मधेश प्रदेशका एक–दुई स्थानमा पनि वर्षा हुने अनुमान गरिएको छ।
कोशी, बागमती, गण्डकी र सुदूरपश्चिम प्रदेशका पहाडी भू–भागका एक–दुई स्थानमा भारी वर्षा हुन सक्ने विभागले जनाएको छ। साथै, मधेश प्रदेशका साथै कोशी र बागमती प्रदेशका तराईका केही स्थानमा हावाहुरी चल्ने सम्भावना रहेको छ।
आज राति पनि देशभर मनसुनी प्रभाव कायम रहनेछ। विभागका अनुसार हिमाली भू–भागका धेरै स्थानमा मेघगर्जन तथा चट्याङसहित मध्यम वर्षा हुने सम्भावना छ। कोशी, गण्डकी, लुम्बिनी र सुदूरपश्चिम प्रदेशका पहाडी तथा तराईका केही स्थान, मधेश प्रदेशका साथै कर्णाली प्रदेशको पहाडी भू–भाग तथा बागमती प्रदेशका पहाडी र तराईका धेरै स्थानमा पनि वर्षा हुने अनुमान गरिएको छ।
विभागले आज राति कोशी र गण्डकी प्रदेशका पहाडी तथा तराईका एक–दुई स्थानमा भारी वर्षा हुन सक्ने जनाएको छ। सम्भावित भारी वर्षा, हावाहुरी तथा चट्याङका कारण हुन सक्ने जोखिमलाई ध्यानमा राखी नदी–नाला आसपास, पहिरोको जोखिम भएका क्षेत्र तथा सडक यात्रामा आवश्यक सावधानी अपनाउन विभागले आग्रह गरेको छ।