बर्दियाका २९ भूमिहीन परिवारलाई लालपुर्जा वितरण

काठमाडौं, असार १८ । सरकारले बर्दिया जिल्लाको बढैयाताल गाउँपालिका–४ का २९ जना भूमिहीन दलित तथा भूमिहीन सुकुम्बासी परिवारलाई जग्गाधनी प्रमाणपत्र (लालपुर्जा) वितरण गरेको छ।
भूमि व्यवस्था, सहकारी तथा गरिबी निवारण मन्त्रालयका अनुसार लामो समयदेखि आफ्नो नाममा जग्गाको स्वामित्व नपाएका स्थानीयले लालपुर्जा प्राप्त गरेसँगै कानुनी रूपमा जग्गाधनी बनेका छन्।
मन्त्रालयले भूमिहीन दलित तथा भूमिहीन सुकुम्बासीलाई जग्गाको स्वामित्व प्रदान गर्ने सरकारको अभियानअन्तर्गत लालपुर्जा वितरण गरिएको जनाएको छ। यसबाट लाभग्राही परिवारले आफ्नो जग्गामाथि कानुनी स्वामित्व प्राप्त गर्नुका साथै विभिन्न सरकारी सेवा तथा वित्तीय सुविधामा समेत सहज पहुँच पाउने अपेक्षा गरिएको छ।
मन्त्रालयका अनुसार भूमिहीन नागरिकलाई जग्गाको स्वामित्व उपलब्ध गराउने अभियानलाई देशका विभिन्न जिल्लामा निरन्तर अघि बढाइनेछ।