निजामती कर्मचारी स्वास्थ्य सेवा अब थप तीन प्रदेशमा पनि

काठमाडौं, जेठ २५ । निजामती कर्मचारी अस्पतालले निजामती कर्मचारी, अवकाशप्राप्त कर्मचारी तथा आश्रित परिवारलाई उपलब्ध गराउँदै आएको छुट तथा सहुलियतसहितको स्वास्थ्य सेवा अब प्रदेशका कर्मचारी तथा तिनका परिवारले पनि पाउने भएका छन् ।
भूमि व्यवस्था सहकारी, संघीय मामिला तथा सामान्य प्रशासन मन्त्रालयले जारी गरेकाे प्रेस विज्ञप्तिअनुसार
गण्डकी अस्पतालबाट पनि निजामती स्वास्थ्य सेवा सुरु भएको छ। सम्झौतासँगै गण्डकी प्रदेशका निजामती कर्मचारी, अवकाशप्राप्त कर्मचारी तथा आश्रित परिवारले निजामती कर्मचारी अस्पतालले उपलब्ध गराउँदै आएको छुट तथा सहुलियतसहितको स्वास्थ्य सेवा पाउने भएकाे मन्त्रालयले जनाएको छ ।
आज मन्त्रलयले जारी गरेकाे विज्ञप्ति अनुसार सेवा प्राप्त गर्न निजामती कर्मचारी वा अवकाशप्राप्त निजामती कर्मचारीले निजामती कर्मचारी अस्पतालबाट जारी भएको आधिकारिक परिचयपत्र साथमा हुनुपर्नेछ ।
मन्त्रालयले मधेस प्रदेशका लागि नारायणी अस्पताल, वीरगञ्ज (पर्सा) र बागमती प्रदेशका लागि भरतपुर अस्पताल, चितवनसँग पनि सम्झौता भएको जनाएको छ । उक्त दुवै अस्पतालबाट आजदेखि निजामती कर्मचारी स्वास्थ्य सेवा सञ्चालनमा आएको पनि मन्त्रालयले जनाएको छ ।