नेवार आन्दोलनका सशक्त व्यक्तित्व विष्णु चित्रकारको निधन

काठमाडौं, चैत्र २३ । नेवार आन्दोलनका एक सशक्त व्यक्तित्व विष्णु चित्रकार साथीहरुसँग मुस्ताङ भ्रमणका क्रममा सोमबार निधन भएको छ । सोमबार विहान ओछ्यानमै हृदयघात भएपछि नजिकको अस्पतालमा लगिएको भएपनि अस्पतालमा मृत घोषित गरिएको थियो । यात्रा दलमा उहाँकी श्रीमति पनि सँगै थिए । 

७६ वर्षीय चित्रकार "२२ सालको आन्दोलन"देखि नेवार क्षेत्रमा सशक्त रुपमा संघर्षरत व्यक्तित्वका रुपमा चिनिन्छन् । २०२२ साल वैशाख १ गतेदेखि रेडियो नेपालबाट नेपालभाषामा समाचार प्रसारन बन्द गरेको विरुद्ध एक वर्षसम्म संचालित विरोध कार्यक्रमलाई २२ सालको आन्दोलन’ को नामबाट चर्चित छ । विभिन्न सहर तथा गाउँघरमा नेपालभाषाप्रति सरकारको रवैयाविरुद्ध साहित्यिक आन्दोलन भएको थियो । यस आन्दोलनमा अग्रपङ्ति मा रहेर काम गर्नेहरुमध्ये एक दिवंगत चित्रकार पनि हुन् । 

नेवार भाषा, जाति तथा संस्कृतिसम्बन्धि जुनै पनि गतिविधिमा सक्रिय रहने गरेका चित्रकार नेपालभाषाको व्याकरण क्षेत्रमा लेखन पनि गर्दछन् । भाषा–व्याकरण सम्बन्धी उनका कृतिहरु पनि प्रकाशित छन् ।