पूर्व र मध्यक्षेत्रकाे उच्च पहाडी क्षेत्रमा भारी हिमपात र वर्षाको सम्भावना

काठमाडौं, कार्तिक १२ । जल तथा मौसम विज्ञान विभागले आगामी दुई दिनका लागि देशका विभिन्न प्रदेशहरूमा भारी वर्षा र हिमपातको सम्भावना रहेको भन्दै सतर्क रहन आग्रह गरेको छ।

विभागद्वारा जारी मौसमसम्बन्धी चेतावनीका अनुसार कार्तिक १३ गते बिहीबार बिहानदेखि कार्तिक १४ गते शुक्रबार बिहानसम्म नेपालको कोशी, बागमती र गण्डकी प्रदेशका उच्च पहाडी तथा हिमाली भूभागका एक–दुई स्थानमा भारी हिमपात हुन सक्ने अनुमान गरिएको छ।

त्यस्तै कोशी, मधेश, बागमती र लुम्बिनी प्रदेशका एक–दुई स्थानमा भारी वर्षा हुने सम्भावना पनि रहेको विभागले जनाएको छ।

मौसम विज्ञहरूले यी क्षेत्रहरूमा वर्षा र हिमपातसँगै नदी–नाला तथा जलस्रोतको सतह बढ्न सक्ने, सडक तथा हवाई यातायातमा अवरोध आउन सक्ने र हिमाली भेगमा चिसो हावाको प्रभाव बढ्ने सम्भावना भएकाले आवश्यक सतर्कता अपनाउन आग्रह गरेका छन्।

विभागले कोशी, मधेश, बागमती र लुम्बिनी प्रदेशका सबै जिल्लामा सतर्क रहन तथा गण्डकी प्रदेशका मनाङ, गोरखा, चितवन लगायतका जिल्लामा पनि सावधानी अपनाउन सिफारिस गरेको छ। साथै, मुगु, कास्की, म्याग्दी, गुल्मी, पाल्पा, अर्घाखाँची, बागलुङ, पर्वत, स्याङ्जा र तनहुँ जिल्लामा आंशिक असर रहने बताइएको छ।

राष्ट्रिय विपद जाेखिम न्यूनीकरण तथा व्यवस्थापन प्राधिकरणले पनि वर्षा र हिमपातको सम्भावना भएका क्षेत्रका स्थानीय तहहरूलाई पूर्वतयारी र सचेत रहन अनुरोध गरेको छ।