संयुक्त राष्ट्रसंघ मुख्यालयअगाडि आत्मदाह गरेका तिब्बती अधिकारकर्मीको मृत्यु

न्युयोर्क, असार १९ । अमेरिकाको न्युयोर्कस्थित संयुक्त राष्ट्रसंघ (यूएन) मुख्यालय बाहिर आत्मदाह गरेका तिब्बती अधिकारकर्मी लोब्गा राङ्जेनको मृत्यु भएको छ। शरीरमा आगाे लगाएपछि पनि निकैबेर उभिएका लाेब्गा ढलेपछि सुरक्षाकर्मीले उद्धार गरेका थिए ।

तिब्बतको स्वतन्त्रता, धार्मिक स्वतन्त्रता तथा मानवअधिकारको पक्षमा लामो समयदेखि अभियान चलाउँदै आएका राङ्जेनले संयुक्त राष्ट्रसंघ मुख्यालयअगाडि आफ्नो शरीरमा आगो लगाएका थिए। घटनापछि उनलाई तत्काल उपचारका लागि अस्पताल लगिएको भए पनि उपचारकै क्रममा मृत्यु भएको अन्तर्राष्ट्रिय सञ्चारमाध्यमहरूले जनाएका छन्।

राङ्जेनले तिब्बतमा भइरहेको भनिएको मानवअधिकार उल्लङ्घनप्रति अन्तर्राष्ट्रिय समुदायको ध्यानाकर्षण गराउने उद्देश्यले आत्मदाह गरेको प्रारम्भिक रूपमा बताइएको छ। घटनापछि संयुक्त राष्ट्रसंघ मुख्यालय आसपास केही समय सुरक्षा व्यवस्था कडा बनाइएको थियो।

तिब्बती अधिकारकर्मीहरूले राङ्जेनको मृत्युलाई तिब्बतको अवस्था विश्वसामु उजागर गर्न गरिएको चरम विरोधको रूपमा व्याख्या गरेका छन्। उनीहरूले तिब्बती नागरिकको मौलिक अधिकार, धार्मिक स्वतन्त्रता तथा सांस्कृतिक पहिचानको संरक्षणका लागि अन्तर्राष्ट्रिय समुदायले थप सक्रिय भूमिका खेल्नुपर्ने मागसमेत गरेका छन्।
घटनाबारे अमेरिकी अधिकारीहरूले अनुसन्धान अघि बढाइरहेका छन् भने संयुक्त राष्ट्रसंघले यस घटनाप्रति गहिरो दुःख व्यक्त गर्दै आधिकारिक प्रतिक्रिया सार्वजनिक गर्ने तयारी गरिरहेको सञ्चारमाध्यमहरूले उल्लेख गरेका छन्।
संयुक्त राष्ट्रसंघका महासचिव एन्टोनियो गुटेरसका प्रवक्ताले घटनाप्रति दुःख व्यक्त गर्दै यो 'दुःखद र विचलित पार्ने घटना' भएको बताएका छन्। साथै, मृतकका परिवारप्रति गहिरो समवेदना व्यक्त गरिएको छ।