इन्धनको मूल्य घट्यो, पेट्रोलमा प्रतिलिटर २० र डिजेल–मट्टितेलमा ३० रुपैयाँ सस्तो

काठमाडौं, असार १७। नेपाल आयल निगमले पेट्रोलियम पदार्थको मूल्यमा उल्लेख्य कटौती गरेको छ। अन्तर्राष्ट्रिय बजारमा पेट्रोलियम पदार्थको मूल्य घटेपछि भारतीय आयल कर्पोरेशन (आईओसी)बाट प्राप्त नयाँ खरिद मूल्यका आधारमा निगमले नयाँ खुद्रा बिक्री मूल्य निर्धारण गरेको हो।
निगमका अनुसार नयाँ मूल्य असार १७ गते बिहानदेखि लागू हुनेछ।
नयाँ मूल्यअनुसार पेट्रोलको मूल्य प्रतिलिटर २० रुपैयाँ घटाइएको छ भने डिजेल र मट्टितेलको मूल्य प्रतिलिटर ३० रुपैयाँ ले घटाइएको छ। यससँगै पहिलो वर्गका क्षेत्रमा पेट्रोलको मूल्य प्रतिलिटर १९४ रुपैयाँ ५० पैसा, दोस्रो वर्गमा १९६ रुपैयाँ र तेस्रो वर्गमा १९७ रुपैयाँ कायम गरिएको छ।
त्यसैगरी डिजेल तथा मट्टितेलको मूल्य पहिलो वर्गमा १९२ रुपैयाँ ५० पैसा, दोस्रो वर्गमा १९४ रुपैयाँ र तेस्रो वर्गमा १९५ रुपैयाँ प्रतिलिटर कायम गरिएको निगमले जनाएको छ।
हवाई इन्धन (आन्तरिक) को मूल्य पनि प्रतिलिटर ४० रुपैयाँ ले घटाएर २२१ रुपैयाँ कायम गरिएको छ। अन्तर्राष्ट्रिय हवाई इन्धनको मूल्य पनि काठमाडौं, पोखरा र भैरहवाका लागि घटाइएको छ।
एलपी ग्यासको मूल्यसमेत प्रतिसिलिन्डर ७० रुपैयाँ ले घटाइएको छ। नयाँ मूल्यअनुसार १४.२ केजीको सिलिन्डरको मूल्य २,०६० रुपैयाँ कायम भएको छ।
निगमले अन्तर्राष्ट्रिय बजारमा पेट्रोलियम पदार्थको मूल्यमा आएको सुधार तथा भारतीय आयल कर्पोरेशनबाट प्राप्त नयाँ खरिद मूल्यका आधारमा मूल्य समायोजन गरिएको जनाएको छ। साथै निगमको डिपो तथा कार्यालयबाट १५ किलोमिटरसम्मका लागि नयाँ खुद्रा बिक्री मूल्य लागू गरिएको पनि जनाएको छ।