गल्छी–त्रिशूली सडकखण्डको गलौंदीमा सवारी आवागमन बन्द

धादिङ, असोज २३। पृथ्वी राजमार्गअन्तर्गत धादिङको गजुरी गाउँपालिका–५ गलौंदी क्षेत्रमा त्रिशूली नदीले कटान गर्दा सडक भासिएपछि उक्त सडकखण्डमा सवारी आवागमन पूर्ण रूपमा बन्द गरिएको छ।
जिल्ला प्रशासन कार्यालय धादिङले शुक्रबार साँझ ६:१५ बजे सूचना जारी गर्दै अर्को सूचना जारी नभएसम्मका लागि गलौंदी क्षेत्रमा सबै प्रकारका सवारीसाधनको आवागमन रोकिएको जनाएको छ।
त्रिशूली नदीको कटानका कारण सडकको भित्री भाग भासिएर क्षति पुगेपछि यातायात सञ्चालनमा समस्या भएको हो। सडकमा ठूलो चिरा परेको र केही भाग भासिएको तस्बिरसहित प्रशासनले सूचना जारी गरेको छ।
सडक बन्द भएपछि पृथ्वी राजमार्ग भएर यात्रा गर्ने सवारीचालक तथा यात्रुलाई वैकल्पिक व्यवस्था र थप सूचनाका लागि सम्बन्धित निकायसँग सम्पर्क गर्न आग्रह गरिएको छ।