दर्ताविहीन १५ कन्सल्टेन्सीमा प्रहरीको छापा, १८ जना पक्राउ

काठमाडौं, असार १२। काठमाडौं उपत्यकाका तीन जिल्लामा दर्ता तथा कानुनी प्रक्रिया पूरा नगरी सञ्चालनमा रहेका १५ वटा कन्सल्टेन्सीमाथि गरिएको अनुगमनका क्रममा १८ जना सञ्चालक तथा प्रतिनिधि पक्राउ परेका छन्।
प्रहरीका अनुसार काठमाडौं, ललितपुर र भक्तपुरका विभिन्न स्थानमा सञ्चालित कन्सल्टेन्सीहरूको अनुगमन गर्दा कानुनी रूपमा दर्ता नभई तथा आवश्यक प्रक्रिया पूरा नगरी व्यवसाय सञ्चालन गरेको पाइएपछि उनीहरूलाई नियन्त्रणमा लिइएको हो।
पक्राउ परेका १८ जनामध्ये १४ जनालाई थप अनुसन्धान तथा कारबाहीका लागि जिल्ला प्रहरी परिसर काठमाडौं पठाइएको छ। यस्तै, दुई जनालाई जिल्ला प्रहरी परिसर भक्तपुर र दुई जनालाई जिल्ला प्रहरी परिसर ललितपुर पठाइएको प्रहरीले जनाएको छ।
कारबाहीमा परेका कन्सल्टेन्सीहरूमा Guruba/Study Glider, LEXICO Education, Pascal Education, Apitome Education, Meghatech Education, Skill Point Education, Vibrant Education, Dream Education, Universal Gateway, Victory Education, 24 Hours Education, Greener Education, Global Impact, Ureshi Education तथा Bloom Abroad रहेका छन्।
विदेश अध्ययनका लागि परामर्श सेवा प्रदान गर्ने नाममा सञ्चालनमा रहेका यस्ता संस्थाले आवश्यक कानुनी प्रक्रिया पूरा नगरी व्यवसाय सञ्चालन गर्दा सेवाग्राहीहरू ठगिने जोखिम बढ्ने भएकाले नियमित अनुगमनलाई तीव्रता दिइएको सम्बन्धित निकायले जनाएको छ।
प्रहरीले कानुनविपरीत सञ्चालनमा रहेका शैक्षिक परामर्श संस्थामाथि निगरानी र कारबाहीलाई आगामी दिनमा समेत निरन्तरता दिइने बताएको छ। साथै, विदेश अध्ययनका लागि परामर्श सेवा लिनुअघि सम्बन्धित संस्था कानुनी रूपमा दर्ता भए/नभएको यकिन गर्न सेवाग्राहीलाई आग्रह गरिएको छ।