प्रि-मनसुनमा ४५ वर्षयताकै सबैभन्दा धेरै वर्षा, सन् १९९० को रेकर्ड समेत तोडियो

काठमाडौं, असार ४ । यस वर्षको प्रि-मनसुन (मार्च–मे) अवधिमा नेपालमा पछिल्लो ४५ वर्षयताकै सबैभन्दा धेरै वर्षा भएको छ। जल तथा मौसम विज्ञान विभागले सार्वजनिक गरेको तथ्यांकअनुसार सन् २०२६ मा प्रि-मनसुन अवधिमा ३३९.७७ मिलिमिटर वर्षा मापन भएको छ, जुन हालसम्मकै उच्च रेकर्ड हो।

प्रि-मनसुन सिजनमा नेपालमा औसत २२६.३ मिलिमिटर पानी पर्ने गर्छ। तर यस वर्ष औसतको १४५.५ प्रतिशत अर्थात ३३९.७ मिलिमिटर पानी परेको विभागले जनाएको छ। यससँगै यसअघि सन् १९९० मा कायम भएको ३३१.४० मिलिमिटर वर्षाको रेकर्ड समेत तोडिएको छ।
वर्षा अभिलेखअनुसार दोस्रो स्थानमा सन् १९९० को ३३१.४० मिलिमिटर, तेस्रो स्थानमा सन् २००० को ३२३.१९ मिलिमिटर, चौथो स्थानमा सन् २०२१ को ३१७.८८ मिलिमिटर तथा पाँचौं स्थानमा सन् २०२० को ३१५.७८ मिलिमिटर वर्षा रहेको छ।
विभागले सन् १९८१ देखि देशभरका १३६ वटा वर्षा मापन केन्द्रबाट संकलित तथ्यांकका आधारमा प्रि-मनसुन वर्षाको विश्लेषण गर्दै आएको जनाएको छ। सोही अभिलेखअनुसार यस वर्षको वर्षा मात्रा सबैभन्दा उच्च देखिएको हो।
विज्ञहरूका अनुसार प्रि-मनसुन अवधिमा औसतभन्दा धेरै वर्षा हुनु जलवायु परिवर्तनका प्रभावमध्ये एक संकेत हुन सक्ने बताइएको छ। यसले मनसुन अवधिमा बाढी, पहिरो तथा डुबानजस्ता विपद्का जोखिम बढ्न सक्ने भएकाले सम्बन्धित निकाय तथा समुदायलाई पूर्वतयारीमा थप सतर्क रहन सुझाव दिइएको छ।