सरकारद्वारा मध्यपूर्वका लागि श्रम स्वीकृति खुला गर्ने निर्णय

काठमाडौं, चैत ३ । नेपाल सरकार, श्रम, रोजगार तथा सामाजिक सुरक्षा मन्त्रालयले मध्यपूर्वका विभिन्न मुलुकहरूका लागि व्यक्तिगत र संस्थागत श्रम स्वीकृति खुला गर्ने निर्णय गरेको छ।

मन्त्रालयको गत फागुन १७ गतेको निर्णयअनुसार यूएई , कतार, कुवेत, बहराइन, ओमान, साउदी अरेबिया, यमन, जोर्डन, लेबनान, टर्की र इजरायल लगायत मध्यपूर्वी मुलुकहरूका लागि श्रम स्वीकृति प्रदान गरिने भएको हो।

यसअघि श्रम स्वीकृति समाप्त भएर पुनः नवीकरण गर्न नपाएका श्रमिकहरूले समेत पुनः श्रम स्वीकृति पाउने भएका छन्। परराष्ट्र मन्त्रालयको आजको सिफारिस र वैदेशिक रोजगार विभागको लेखी आएको आधारमा मन्त्रालयको चैत ३ गतेको निर्णयबाट यो व्यवस्था गरिएको हो।

गैरआवासीय नेपाली संस्था, दूतावासहरू लगायत श्रमिक संस्थाहरूले श्रम स्वीकृति खुला गर्न माग गरेपछि सरकारले यो निर्णय गरेको बताइएको छ।